Sai dai idan a samu wani sauyi na karshe, JagoranKwankwasiyya, Rabiu Kwankwaso, zai gabatar da tsohon mataimakin gwamnan Jihar Kano, Aminu Abdussalam, a matsayin dan takarar maslaha da juna na jam’iyyar NDC a Jihar Kano.
Mista Abdussalam ya yi murabus a matsayin mataimakin gwamna a watan Maris, makonni kadan bayan Majalisar Dokokin Jihar Kano ta aike masa da sanarwar tsige shi.
Majiyoyi masu kusanci da lamarin sun ce shawarar ta biyo bayan tattaunawar sirri mai tsayi a cikin Kwankwasiyya da kuma tsakanin manyan abokan siyasa.
Tsohon dan takkarar gwamna a APC a zaben 2023, Nasiru Gawuna, da farko an dauke shi a matsayin babban mai neman samun tikitin. Duk da haka, Mista Kwankwaso ya zabi Mista Abdussalam a ranar Laraba.
A cewar majiyoyi, Mista Kwankwaso ya ba Mista Gawuna tayin matsayin mataimakin gwamna ko tikitin Sanata na Kano ta Tsakiya. Amma tsohon dan takarar gwamnan ya ki duka tayi biyun, sannan ya yi alkawarin yin aiki domin nasar jam’iyyar.
Majiyoyi sun ce Mista Gawuna ya shaida wa Mista Kwankwaso cewa ya shiga Kwankwasiyya ba tare da wani sharadi ba, don haka ba zai fita ba saboda bai samu tikitin gwamna ba.
DAILY NIGERIAN ta gano cewa kin yarda da tayin da Mista Gawuna ya jinkirta sanarwar gabatar da Mista Abdussalam a ranar Laraba, sakamakon matsin lamba daga wasu fitattun mutane da ke karfafa Mista Kwankwaso ya duba cancantar zabe ta Mista Gawuna ya sake tunani kan shawararsa.
Masu goyon bayan takarar Mista Gawuna suna jayya cewa dan takarar da zai iya kara wa da Gwamna Abba Yusuf ya kamata ya fito daga Kano ta Tsakiya. “Na farko, Gawuna yana da matukar farin jini a Kano ta Tsakiya, inda mafi yawan kuri’u su ke. Na biyu, tun da Abba dan Kano ta Tsakiya ne kuma yana kan wa’adinsa na farko, mafi kyawun mafita shi ne a tsayar da dan takara daga yankin, saboda yankin kar ya ga kamar zai yi rashi. Wannan ita ce ka’idar da NDC ta yi amfani da ita a matakin kasa ta hanyar mika shugabancin kasa kudu tun da shugaban kasa na kudu yana kan wa’adinsa na farko,” in ji wani da ya nemi a sakaye sunansa.
Amma masu goyon bayan Mista Abdussalam sun yi kalubalen cewa tsohon mataimakin gwamnan ya nuna jajircewa, amana da sadaukarwa da ba a saba gani ba wajen cigaban tsarin na Kwankwasiyya.
