Gwamnatin tarayya ta tabbatar da sakin jirgin rundunar sojin saman Najeriya tare da sojoji goma sha ɗaya da aka tsare a ƙasar Burkina Faso bayan da jirgin ya yi saukar gaggawa.
Ma’aikatar harkokin waje ta bayyana cewa jirgin da ma’aikatan da ke cikinsa sun samu ’yanci, lamarin da ke nuna kammala tattaunawar diflomasiyya da aka yi tsakanin ɓangarorin biyu.
Wannan tabbaci ya biyo bayan ganawar da ministan harkokin waje Yusuf Tuggar ya yi da shugaban gwamnatin soja ta Burkina Faso Ibrahim Traoré a birnin Ouagadougou, inda Tuggar ya jagoranci tawagar Najeriya zuwa ƙasar.
Ziyarar ta gudana ne bisa umarnin shugaban ƙasa Bola Tinubu, a wani yunƙuri na warware matsalar ta hanyar tattaunawa da fahimtar juna tsakanin ƙasashen.
Lamarin ya faru kusan makonni biyu da suka gabata lokacin da jirgin rundunar sojin saman Najeriya nau’in C-130 mai ɗauke da sojoji goma sha ɗaya ya yi saukar gaggawa a Bobo Dioulasso yayin tafiya zuwa ƙasar Portugal.
Rundunar sojin saman Najeriya ta bayyana cewa an gano matsalar fasaha ne a cikin jirgin, lamarin da ya sa aka aiwatar da saukar gaggawa bisa ƙa’idojin sufurin jiragen sama na ƙasa da ƙasa, duk da cewa daga baya wasu shugabannin yankin Sahel sun bayyana saukar a matsayin abin da ya haifar da takaddama kan amfani da sararin samaniya.
