Shahararriyar jarumar Kannywood Nafisa Abdullahi ta ce ba ta ga dalilin da zai sa ta yi aure ba idan aure yana nufin zama “bawa” a gidan wani, tana mai cewa mata da yawa ba su da farin ciki a aurensu kuma ba sa samun fa’ida mai yawa daga wannan al’amarin.
A cikin wani bidiyo da ya bazu a kafafen sada zumunta, jarumar ta ce maza da yawa ba sa yin aure saboda wajibin addini ko kuma saboda kauna, sai dai saboda suna son mace da za ta musu girki, ta wanke musu tufafi, ta haifa musu ‘ya’ya, ta kuma kula da gida.
“Maza da yawa ba sa yin aure saboda Sunnah ce. Suna ganinsa a matsayin hanyar samun macen da za ta musu girki, ta wanke musu tufafi, ta haifa musu ‘ya’ya, ta kula da ‘ya’yan, ta kuma yi komai don burge su,” in ji ta.
Nafisa ta kara zargin cewa mata da yawa masu aure suna nadama da yin aure, tana mai cewa da kanta ta san mata da yawa da ba sa farin-ciki a dangantakarsu.
A cewarta, mata kan dauki nauyin yawancin al’amura a aure ba tare da sun mori fa’idojin da suka dace ba, ta kara da cewa wasu matan ana mu’amala da su kamar bayi maimakon abokan aure.
Da take yin tambaya kan me zai sa ta saka kanta cikin irin wannan tsari, jarumar ta yi tambayar “Me zai sa in bata lokacina in je in zama baiwa a gidan wani?”
Kalaman sun jawo cece-kuce a kafafen sada zumunta, inda wasu suka goyi bayan ra’ayinta kan matsayin jinsi da abin da ake tsammani a aure, yayin da wasu suka ce kalamanta ba sa nuna yadda auratayya da dama masu nasara suke.
