Hukumar gudanarwar Jami’ar Nnamdi Azikiwe (UNIZIK), Awka, Jihar Anambra, ta yi Allah-wadai da zargin kai wa wani malami hari a Sashen Nazarin Harshen Chanis, bayan an yi zargin ya yi yunkurin cin zarafin jima’i ga wata daliba.
An kai wannan zargin na cin zarafin jima’i ga hukumar jami’ar ne bayan wani bidiyo da ya yadu a yanar gizo a ranar Asabar, inda wasu daliban jami’ar suka bayyana suna dukan malamin a harabar jami’ar bayan an kama shi da zargin ya lalata wata daliba.
Bidiyoyin lamarin da ya faru a cikin harabar jami’ar a ranar Asabar sun riga sun bazu a kafafen sada zumunta daban-daban kuma sun jawo suka da martani mai yawa, inda mutane ke kiran a gudanar da cikakken bincike.
A cikin wata sanarwa da Darakta mai kula da bayani da hulda da jama’a na jami’ar, Aloysius Attah, ya fitar, hukumar jami’ar ta bayyana lamarin a matsayin abin takaici, kuma ta yi Allah-wadai da amfani da tashin hankali, daukar doka a hannu, ko abin da ta kira “shari’ar jama’a” a kowane yanayi.
Jami’ar ta ce Mataimakin Shugaban Jami’ar, Ugochukwu Anyaehie, ya dade yana jaddada cewa UNIZIK ba ta lamunci cin zarafin jima’i, tsangwama da sauran miyagun halaye ba.
Sai dai hukumar ta jaddada cewa dole ne a bi hanyoyin da jami’ar ta tanada da tsarin gaskiya wajen magance irin wadannan zarge-zarge.
“Ba a ba kowa ko wata kungiya izinin daukar doka a hannu a cikin muhallin jami’ar ba,” in ji sanarwar.
Saboda muhimmancin zargin, hukumar jami’ar ta ba da umarnin a gaggauta gudanar da bincike mai zurfi kuma mara nuna son zuciya domin gano gaskiya da abin da ya faru.
Ta kara da cewa ana nazarin lamarin a halin yanzu, kuma an fara tsarin gudanarwa da suka dace domin tabbatar da cewa an yi adalci ga dukkan bangarorin da abin ya shafa.
UNIZIK ta sake jaddada aniyarta na kare mutunci, tsaro da walwalar ma’aikata da dalibai, tare da alkawarin daukar mataki mai tsauri kan duk wanda ya saba wadannan ka’idodi.
Jami’ar ta ce za ta sanar da jama’a sabbin abubuwan da suka taso kan lamarin a lokaci mai zuwa.
