Babban kantin sayar da kayayyaki na SUFAYE da ke Kano ya mika kayayyakin da suka lalace da wadanda wa’adinsu ya kare, da suka kai na sama da Naira miliyan 28 ga Hukumar Kare Hakkin Masu Sayayya ta Jihar Kano (KSCPC) domin lalatawa.
Wannan na kunshe a cikin wata sanarwa da Daraktan Wayar da Kan Jama’a na KSCPC, Jamilu Mustapha, ya fitar a ranar Talata a Kano.
Babban Sakataren Hukumar, Dr Ibrahim Garba Muhammad, ya bayyana matakin da shugabancin gudanarwar shagon ya dauka a matsayin wani hukunci gagarumin.
Garba Muhammad ya yi kira ga sauran kamfanoni da ‘yan kasuwa a jihar da su yi koyi da SUFAYE ta hanyar fitar da gurbatattun kayayyaki daga kasuwa maimakon sayar da su ga jama’a.
Babban sakataren ya yaba wa mazauna jihar, kamfanoni da ‘yan kasuwa a jihar bisa hadin kai da goyon bayan da suke bayarwa wajen kare masu sayayya da kuma tabbatar da tsaro da ingancin kayayyaki a kasuwa.
Manajan shagon, Alhaji Jabir, ya ce wannan mataki yana da alaka da kokarin kamfanin na ganin cewa kayayyakin ba su isa ga abokan cinikinsu ba.
Ya ce shugabancin gudanarwar shagon koyaushe suna duba kayayyakinsu domin bin ka’idojin hukuma da kuma kyawawan dabi’un kasuwanci.
Ya yaba wa KSCPC bisa ci gaba da sanya ido da kula da kayayyaki a kasuwa, inda ya ce irin wannan kokari zai ba da gudunmawa sosai wajen kare lafiyar jama’a.
Jabir ya ce kamfanin zai ci gaba da samar da ingantattun kayayyaki, musamman abubuwan sha, yayin da yake ba da gudunmawa ga ci gaban tattalin arzikin jihar.
