Wata Babbar Kotun Tarayya da ke Abuja ta bada umarnin a tsare Maryam Isah Shehu, dalibar dake shekarar karshe a Jami’ar Bayero, Kano (BUK), a gidan gyaran hali bayan da Hukumar dake Yaki da Masu Yi wa Tattalin Arzikin Kasa Ta’annati (EFCC) ta gurfanar da ita bisa zargin cin zarafi ta yanar gizo.
An gurfanar da Shehu, wacce ’yar blog ce daga Kano, a gaban Mai Shari’a Joyce Abdulmalik a ranar Alhamis, 20 ga Agusta, 2026, kan sabuwar kara da aka gyara.
A cewar karar, EFCC ta ce a ranar 21 ga Yuni 2026, Shehu ta wallafa sako a shafin Instagram @maryam_shehu wanda ke da nufin bata sunan Hukumar.
EFCC ta musanta zargin da aka yi a cikin wallafar, wanda ya ce jami’an hukumar sun daki Ahmed Uthman bisa umarnin wani daraktan yanki da ake zargi da karbar Naira miliyan 20 daga Usman Iya Abbas.
Hukumar ta ce wannan wallafa laifi ne a karkashin Sashe na 24(2)(c) na Dokar Hana Laifukan Yanar Gizo ta 2015, wadda aka gyara a 2024, kuma hukuncinsa yana cikin Sashe na 24(2)(c)(ii) na wannan dokar.
Elizabeth Alabi daga sashen Shari’a da Gurfanarwa na EFCC ce ta sanya hannu a sabuwar karar
Tarihin Lamari
Lamarin ya biyo bayan zarge-zargen da Shehu ta yi kan halayen wasu jami’an EFCC.
A cewar wani lauya mai kare hakkin dan adam, Abba Hikima, an kama dalibar BUK din a Kano sannan aka kai ta Abuja bayan ta yi zargin cin hanci da rashawa akan jami’an Hukumar.
Ya ce ba a kama ta ba bisa zargin sata, zamba ko halasta kudin haram ba, sai dai bisa wallafar da ta yi game da EFCC da jami’anta.
A cewar abin da ya faru a kotu a ranar Alhamis, Shehu ta riga ta shafe kusan kwanaki 35 a tsare kafin a gurfanar da ita. Bayan sauraron shari’ar, an tsare ta a Gidan Gyaran Hali na Suleja har zuwa 31 ga Agusta.
Da yake zantawa da SolaceBase, Abba Hikima ya ce an ba Maryam Shehu ƙar sau ɗaya a yammacin Laraba, sannan aka ba ta sabuwar ƙara a ranar Alhamis a kotu, bayan ta shafe kwanaki 35 a hannun EFCC.
Ya ce sun shigar da bukatar ba ta beli da kuma kare hakin dan adam na wanda ake tuhuma. Chinala Amalaha ne ya wakilce ta a kotu a madadin Abba Hikima.
