Hukumar Yaki da Masu yi wa Tattalin Arziki Kasa Ta’annati (EFCC) ta kama tsohon Ministan Wutar Lantarki, Saleh Mamman, wanda a kwanakin baya Kotun Tarayya da ke Abuja ta yanke wa hukuncin dauri kan almundahana da kudi gwamnati a lokacin da yake kan wannan mukami.
Shugaban EFCC, Ola Olukoyede, ne ya tabbatar da kama shi da misalin karfe 3:30 na safiyar Talata.
An kama shi a Kaduna tare da wasu mutum biyu da ke kare shi, gidan da aka kama shi a yanzu ana bincike a kai shi.
Kotun ta same shi da laifi a dukkan tuhume-tuhume 12 da EFCC ta gabatar masa. A ranar 13 ga Mayu ne aka yanke wa Mamman hukunci da daurin shekara 75 a gidan gyaran hali a zaman kotun da bai halarta ba kan zargin karkatar da Naira 33.8 biliyan da ke da alaka da ayyukan samar da wutar lantarki na Zungeru da Mambilla.
