Hukumomin Saudi Arabia sun musanta fitar da wata sanarwa da ke sanar da matafiya cewa ta sanya takunkumin hana shiga kasar daga Najeriya har ma da wasu kasashe 13.
Cikin bayanin ya bayyana kasashen Masar, Indiya, Pakistan, Maroko, Tunisiya, Yemen, da Aljeriya a cikin kasashen da ke fuskantar takunkumin.
Sauran su ne Najeriya, Jordan, Sudan, Iraq, Indonesia, Ethiopia, da Bangladesh an kuma sanya sunayensu a jerin sunayen wadanda aka takaita neman sabbin bizar Saudiyya na gajeren lokaci, gami da bizar kasuwanci ko ziyara.
A cewar su, an tsara takunkumin zai fara aiki daga ranar 13 ga Afrilu, in ji sanarwar.
Takardar ta kara da cewa, ba za a ba wa ‘yan kasar nan izinin shiga kasar Saudi Arabia ba daga ranar da za ta fara aiki ba, ko da kuwa suna da takardar izinin shiga kasar.
“Rashin bin ka’ida na iya haifar da dakatarwar shekaru 5 daga shiga KSA,” in ji sanarwar. Amma, Cibiyar Yawon shakatawa ta Saudiyya ta karyata takardar a matsayin wanda ba na hukuma ba lokacin da wata jarida ta intanet TheCable ta tuntube ta.
Hukumar ta shaidawa jaridar TheCable cewa, da’ira guda daya tilo da hukumomin Saudiyya suka fitar ita ce ka’idojin tafiya aikin hajji.
“Duk wanda ke da bizar yawon bude ido ba a ba shi izinin yin aikin Hajji, ko shiga ko zama a cikin Makkah a tsakanin 01thul Quda zuwa 14thul Hijjah 1446 AH (29 ga Afrilu zuwa 11 ga Yuni 2025 AD),” in ji hukumar Saudiyya a ranar Alhamis.
Ana ba da bizar aikin hajjin Saudiyya ne kawai don aikin hajji, kuma yana aiki ne kawai a lokacin ibadar.
Ana bukatar musulmin da ke son zuwa Saudi Arabia su nemi takardar izinin aikin hajji banda bizar yawon bude ido.
