Gwamnan Jihar Kano, Abba Kabir Yusuf ya bayyana cewa gwamnatinsa ta kammala kashi 90 cikin 100 na alkawuran da ta yiwa al’ummar jihar a lokacin yakin neman zabe.
Gwamnan ya ce an riga an fara aiki don tabbatar da cewa an cika sauran kashi 10 cikin 100 kafin karshen wa’adin gwamnatin a watan Mayu 2027.
Gwamna Yusuf ya yi wannan bayani ne yayin ziyarar Hawan Nasarawa da Sarkin Kano na 16, Muhammadu Sanusi II ya kai a Gidan Gwamnati yayin bikin Hawan Nasarawa matsayin wani bangare na bukukuwan Idin Babbar Sallah Kano.
A cewarsa, gwamnatinsa ta samu nasarori masu yawa a sassa daban-daban da suka hada da ilimi, lafiya, noma, tsaftar muhalli, da kuma karfafa matasa.
“Mun kammala kashi 90 na alkawuran yakin neman zabenmu, kuma mun riga mun fara aiki don kammala sauran kashi 10 cikin wannan shekarar,” gwamnan ya ce.
“A ranar 29 ga Mayu, 2027, al’ummar Kano za su ga cewa mun cika kashi 100 na alkawuran yakin neman zabenmu. Haka kuma za mu kawo wasu sabbin ayyuka da shirye-shirye da ba a ambace su a cikin manufofinmu ba, duk don amfanin jihar Kano,” in ji shi.
Gwamna Yusuf ya ce gwamnatinsa ta himmatu wajen inganta rayuwar mazauna jihar ta hanyar manufofi da ayyukan ci gaba da suka fi mayar da hankali kan al’umma.
Ya kuma sake tabbatar da aniyar gwamnatinsa na kiyaye zaman lafiya, hadin kai da ci gaba a fadin jihar.
SolaceBase ta ruwaito cewa Hawan Nasarawa na daya daga cikin manyan bukukuwan gargajiya a lokacin Sallah, ya samu halartar manyan jami’an gwamnati, sarakuna, shugabannin siyasa da dubban al’umma.
