Dangane da karuwar matsalolin sauyin yanayi, Cibiyar jagoranci da bada shawarwari ta Fiscal Discipline and Development Advocacy Centre (FIDAC) tare da hadin gwiwar gidauniyar Aminu Magashi Garba da ci gaban kasa da kasa ta UK, sun shirya taron bita na yini daya a Kano, domin tattauna yadda ‘yan kasar ke tafiyar da harkokin kasafi da samar da kudade.
SolaceBase ta ruwaito cewa taron wanda aka gudanar a ranar Alhamis ya mayar da hankali ne kan wayar da kan jama’a game da manufofin sauyin yanayi da kuma yadda jihar Kano za ta iya gabatar da shirye-shiryen da suka dace da yanayin cikin kasafin kudinta.
Jagoran taron kuma babban daraktan hukumar ta FIDAC, Dr. Abdusalam Muhammad Kani, ya bayyana muhimmancin taron, inda ya bayyana cewa an shirya taron ne domin wayar da kan ‘yan kasa kan muhimmancin dorewar muhalli.
“Babban manufarmu ita ce tabbatar da haɗin gwiwar ‘yan ƙasa, wayar da kan jama’a, game da sakamakon sauyin yanayi,” in ji shi.
“A halin yanzu jihar Kano tana da manufar sauyin yanayi, kuma aikinmu na masu ba da shawara shi ne tabbatar da cewa an dauki matakin aiwatar da shi da gaske.”
Labari mai alaƙa: Tsaftar muhalli: Za mu hukunta masu karya dokokin tsaftar muhalli da kuma fito da sabbin tsare-tsare
Dakta Kani ya kuma bayyana kudirin jihar na tabbatar da dorewar muhalli, inda ya bayyana cewa kasafin kudin shekarar 2025 da ya ware kusan Naira biliyan 30 domin ayyukan kula da yanayin abin a yaba ne.
“Manufarmu ita ce ganin Kano ta samu ci gaba a cikin shekaru biyu masu zuwa ta hanyar ci gaba da sa ido, bayar da shawarwari da wayar da kan jama’a.”
“Don haka za mu ci gaba da shirya irin wannan taron karawa juna sani don ilmantar da mutane da kuma sanar da mutane dabarun dakile sauyin yanayi.”
Daraktan sauyin yanayi a ma’aikatar muhalli da sauyin yanayi ta jihar Kano, Umar Sani Anka, ya gabatar da wani bayani kan yadda jihar ke shirin shigar da sabon tsarin kasafin kudi “Green Budgeting” cikin tsare-tsarenta na kudi.
“Kano ta kashe sama da Naira biliyan 30 don tabbatar da cewa an shigar da ayyukan sauyin yanayi cikin harkokin mulki,” in ji Anka.
Da yake kwatanta tsare-tsare na Kano da manufofin muhalli na Ruwanda, Anka ya bayyana kwarin gwiwar samun irin wannan nasarar.
Anka ya kuma yi kira ga ‘yan kasar da su dauki nauyin kare muhalli, yana mai jaddada cewa kokarin gwamnati kadai ba zai wadatar ba.
An kammala taron bitar tare da yin kira da a ci gaba da ba da shawarwari da kuma hada kan al’umma don tabbatar da aiwatar da manufofin sauyin yanayi yadda ya kamata a jihar Kano.
