Wasu matasa biyu a Kano, Sadiq Isyaku da Auwal Isyaku, sun rasu ranar Litinin bayan sun fada cikin wani budadden ruwa yayin da suke kokarin tserewa daga wasu ‘yan daba da ke kokarin kwace musu wayoyinsu.
A cikin wata sanarwa da aka fitar ranar Talata a Kano, hukumar kashe gobara ta Jihar Kano ta bayyana cewa rasuwar matasan biyu, wadanda dukkaninsu ‘yan shekara 18 ne, ta faru ne a Ring Road, Kureken Sani a karamar hukumar Kumbotso ta Jihar Kano.
Sanarwar da jami’in hulda da jama’a na hukumar, Alhaji Saminu Abdullahi, ya fitar ta rawaito daraktan hukumar, Alhaji Sani Anas, yana cewa an gano gawarwakin mutanen biyu suna shawagi a kan ruwan da ke bude a Ring Road.
Ya bayyana cewa sun samu kiran gaggawa daga Muhammed Abba cewa gawarwaki biyu na shawagi a saman wani budadden ruwa.
Bayan samun rahoton, nan take aka tura tawagar ceto zuwa wurin domin daukar mataki.
Shugaban hukumar kashe gobarar ya ce bincike ya nuna cewa lamarin ya faru ne yayin da matasan biyu ke kokarin tserewa daga wasu da ake zargi da satar waya da ke binsu.
Ya kara da cewa yayin da suke kokarin ceton kansu, sai suka fada cikin budadden ruwan ba tare da sun sani ba.
Anas ya bayyana cewa an fitar da matasan daga ruwan amma tuni sun rasu, sannan aka mika gawarwakinsu ga mahaifinsu Ibrahim Shehu, mazaunin unguwar Unguwa Uku.
A wani lamari daban kuma, wani mutum mai shekara 40 mai suna Shitu Balarabe ya fada cikin rijiya a Durumin Zungura kusa da Assahabul Khahafi a karamar hukumar birnin Kano.
Ya ce sun samu kiran gaggawa daga Abdullahi Aminu da misalin karfe 7:12 na yamma cewa wani mutum ya fada cikin rijiya.
Bayan samun rahoton, nan take aka tura tawagar ceto zuwa wurin domin taimakawa.
Ya kara da cewa an ceto Balarabe da rai sannan aka mika shi ga dan uwansa Jamilu Balarabe, mazaunin Durumin Zungura a birnin Kano.
Shugaban hukumar ya bukaci jama’a da su rika daukar matakan kariya domin hana faruwar irin wadannan abubuwa, tare da tabbatar da cewa yara da matasa suna guje wa budadden ruwa.
Haka kuma ya shawarci jama’a da su rufe rijiyoyi domin hana mutane ko dabbobi fadawa ciki.
