Dan takarar Jam’iyyar PDP, Mohammed Kasim, ya lashe zaɓen shugabancin Ƙaramar Hukumar Gwagwalada da aka gudanar a matsayin wani ɓangare na zaɓukan ƙananan hukumomi na Babban Birnin Tarayya Abuja.
Jami’in tattara sakamakon zaɓen na Hukumar Zaɓe Mai Zaman Kanta ta Ƙasa (INEC), Philip Akpen, ya sanar da sakamakon a safiyar Lahadi, inda ya ce Kasim ya samu ƙuri’u 22,165.
Ya kayar da abokin hamayyarsa na Jam’iyyar All Progressives Congress (APC), Yahaya Shehu, wanda ya samu ƙuri’u 17,788.
Akpen ya bayyana zaɓen a matsayin wanda ya gudana cikin lumana da tsari.
Ya ce Mohammed Kasim na PDP, bayan ya cika dukkan sharuddan doka, an ayyana shi a matsayin wanda ya yi nasara kuma aka zaɓe shi.
Haka kuma, Biko Umar na Jam’iyyar APGA ya zo na uku da ƙuri’u 1,687.
An gudanar da zaɓukan ƙananan hukumomin a dukkanin ƙananan hukumomi shida na Abuja (AMAC), Abaji, Bwari, Gwagwalada, Kuje da Kwali, inda aka yi zaɓen shugabanni da kansiloli.
A Ƙaramar Hukumar Gwagwalada, adadin masu rajista ya kai 207,577, yayin da aka tantance masu kaɗa ƙuri’a 46,294.
Jimillar ingantattun ƙuri’u sun kai 43,960, yayin da ƙuri’u 1,521 aka soke.
