Shugaban Uganda Yoweri Museveni ya saka dokar kulle ta mako uku a wasu gundumomi biyu da cutar Ebola ta shafa.
Za a rufe wuraren shan barasa da na rawa da kuma na bauta a Mubende da Kassanda.
Kazalika, za a hana motocin haya shiga da fita gundumomin, motocin da ke ɗauke da kayayyaki za a bari su shiga.
Wakiliyar BBC ta ce haka kuma shugaban ya saka dokar taƙaita zirga-zirga da za ta soma aiki daga 7:00 na yamma zuwa 6:00 na safe a gundumomin biyu.
Aƙalla mutum tara ne aka tabbatar da rasuwarsu sakamakon Ebola a ƙasar tun bayan bullarta a wannan karon.
