An dawo da wutar lantarki daga babban layin samar da wuta na ƙasa bayan shafe sa’o’i ana fuskantar katsewa a faɗin ƙasar sakamakon rugujewar tsarin da ta faru da ranar Litinin.
Sabbin alkaluma daga babban layin wutar lantarki na ƙasa sun nuna cewa an fara rarraba wuta zuwa kamfanonin rarraba wutar lantarki da dama.
Rahotanni sun nuna cewa an raba jimillar megawatt 505 na wutar lantarki zuwa kamfanonin rarraba wuta na Ibadan, Ikeja, Enugu, Kaduna, Kano, Eko, Abuja, Jos, Benin da Yola, inda kowanne ke karɓar kaso daban-daban na wuta a lokacin sabuntawar bayanai.
Sai dai kamfanin rarraba wutar lantarki na Port Harcourt bai samu wuta ba a wancan lokacin, lamarin da ke nuna cewa aikin dawo da wutar lantarki yana ci gaba a wasu yankuna.
Labari mai alaƙa: Babban layin wutar lantarki na ƙasa ya faɗi
Rugujewar da ta faru tun da farko ta jefa manyan sassan ƙasar cikin duhu, inda rarraba wutar lantarki ta ragu zuwa kusan sifili a mafi yawan hanyoyin rarraba wuta. Wannan lamari ya zama na huɗu mafi girma da aka samu na rugujewar babban layin na ƙasa a wannan shekara, wanda ke nuna ci gaba da matsaloli a tsarin isar da wutar lantarki na ƙasar.
Jami’an sashen wutar lantarki sun bayyana cewa ana ci gaba da aikin farfaɗowa da daidaita babban domin ƙara inganta wadatar wuta a duk faɗin ƙasar, tare da ɗaukar matakai na gaggawa don tabbatar da kwanciyar hankali.
Hukumar kula da tsarin wutar lantarki mai zaman kanta ta ƙasa NISO ta tabbatar da cewa an samu tangardar tsarin wuta sakamakon illolin lalata bututun iskar gas na Lagos–Escravos–Lagos, wanda ya janyo faduwar wasu na’urorin samar da wuta da layukan wutar 330kV.
Hukumar ta ƙara da cewa cibiyar kula da ƙasa ta Osogbo ta yi gaggawar dawo da cikakkiyar wuta, yayin da ake ci gaba da bincike domin hana sake faruwar irin wannan tangarda a nan gaba.
