Hon. Abdullahi Zubairu Abiya ya bayyana a matsayin shugaban riko na jam’iyyar NNPP a jihar Kano, bayan tsige tsohon shugaban jam’iyyar na jihar, Hashimu Dungurawa, daga mukaminsa.
Kwamitin zartarwa na jam’iyyar NNPP a matakin jiha ne ya amince da nadin Abiya, bayan wani taron gaggawa da aka gudanar a sakatariyar jam’iyyar da ke Kano.
Mataimakin mai ba jam’iyyar shawara kan harkokin shari’a, Barista Yusuf Mukhtar, ya sanar da wannan mataki, inda ya ce nadin Abiya ya yi daidai da tanade-tanaden kundin tsarin jam’iyyar NNPP.
Karanta: A Gaggauce: NNPP ta kori shugaban jam’iyyar na Kano, Dungurawa makonni biyu bayan sake zaɓensa
Rahotanni daga cikin jam’iyyar sun nuna cewa wannan mataki ya biyo bayan gabatar da ƙudurin tsigewa da korar Dungurawa da kwamitin zartarwa na ƙaramar hukumar Dawakin Tofa ya mika wa shugabancin jam’iyyar a matakin jiha.
Tun da farko, kwamitin zartarwa na Dawakin Tofa, ƙarƙashin jagorancin Hon. Abdullahi Ali Uban Iya Dawanau, ya tura ƙudurin da kwamitin zartarwa na gundumar Gargari ya yanke zuwa ga shugabancin jam’iyyar a matakin jiha, bayan wani taron zartarwa na biyu da aka gudanar makonni biyu bayan babban zaɓe, inda aka zargi Dungurawa da ayyukan da suka saba wa jam’iyya.
Bayan nazartar rahoton, kwamitin zartarwa na jiha ya amince da ƙudurin tare da sahalewa Abdullahi Zubairu Abiya ya zama shugaban riko na jam’iyyar NNPP a Kano, da nufin dawo da ladabi, ƙarfafa haɗin kai da kuma sake tsayar da jam’iyyar kan turbar shirin siyasa na gaba a jihar.
Karin labari: A shirye muke mu karɓi Gwamna. Kano a Jam’iyyar APC – Shugaba
A nasa jawabin, shugaban riko na NNPP a Kano, Hon. Abdullahi Zubairu Imam Abiya, ya jaddada cewa jam’iyyar za ta yi adalci ga kowa, tare da ci gaba da nuna cikakken biyayya ga jagoran jam’iyyar na ƙasa, Sanata Rabiu Musa Kwankwaso, da kuma Gwamnan Kano, Injiniya Abba Kabir Yusuf.
Jaridar Solacebase ta rawaito cewa Hashimu Dungurawa yana mayar da martani ne kan abin da aka bayyana a matsayin dakatarwarsa da wasu mambobin kwamitin zartarwa na jam’iyyar a gundumarsa ta Gargari, a ƙaramar hukumar Dawakin Tofa ta jihar.
Dungurawa ya kuma bayyana cewa har yanzu cikakken mamba ne na jam’iyyar tare da kasancewa halastaccen shugaban jam’iyyar, inda ya yi watsi da rahotannin da ke nuna akasin haka, yana masu cewa ba su da tushe kuma suna yaudara.
Ya yi wa manema labarai jawabi ne a ranar Talata a birnin Kano, a daidai lokacin da ake samun jita-jita kan rikicin shugabanci da kuma zargin ficewar wasu mambobi a reshen jam’iyyar NNPP na jihar Kano.
Dungurawa ya jaddada cewa babu wata shawara da shugabancin jam’iyyar a matakin jiha ko na ƙasa ya ɗauka da ta tsige shi daga mukaminsa, yana mai nacewa cewa matsayinsa na shugabanci yana nan daram.
A cewarsa, jagoran jam’iyyar NNPP, Sanata Rabiu Kwankwaso, na ci gaba da tattaunawa da masu ruwa da tsaki na jam’iyyar domin ƙarfafa haɗin kai a ciki da kuma sake tsayar da jam’iyyar kan turbar samun babban nasara a nan gaba.
Hashimu Dungurawa ya dage cewa babu wata sahihiyar shawara daga shugabancin jiha ko na ƙasa da ta tsige shi, don haka duk wani yunƙuri na korarsa ba shi da tushe a kundin tsarin jam’iyyar.
