Kungiyar Jama’atu Izalatul Bidi’a Wa Iqamatis Sunnah (JIBWIS) rashen jihar Kano, ta bayyana goyon bayanta ga takarar Gwamna Abba Kabir Yusuf a wa’adin mulki na biyu, inda ta danganta hakan da jajircewar gwamnatinsa wajen dawo da sa rai, hanzarta ci gaba da kuma sanya Jihar Kano kan hanyar ci gaba mai dorewa.
Wannan na cikin wata sanarwa da Daraktan yada labaran Gwamnan, Sunusi Bature Dawakin Tofa, ya fitar a ranar Asabar.
Shugaban JIBWIS na Jihar Kano, Farfesa Abdullahi Saleh, ne ya bayyana hakan lokacin da ya tarbi Gwamna Yusuf a gidansa yayin ziyarar ta’aziyya kan rasuwar matarsa kwanan nan.
Babban malamin ya bayyana godiyarsa ga Gwamna Yusuf bisa jagorantar ziyarar ta’aziyyar da kansa, inda ya ce wannan lamari ya nuna tausayi, tawali’u da kuma girmamawa ga shugabannin addini a jihar.
Ya bayyana cewa nasarorin da gwamnatin yanzu ta samu sun sake dawo da kwarin gwiwar jama’a kan gwamnati kuma sun sanya Jihar Kano ta zama abin koyi wajen jagoranci mai amfani ga jama’a da kuma cika alkawari.
A cewarsa, ayyukan da Gwamna Yusuf ya fara yana da kyau a ci gaba da su domin bai wa gwamnatin damar kammala abin da ta fara da kuma cimma burinta na dogon lokaci ga jihar.
Saboda haka Farfesa Abdullahi Saleh ya ayyana goyon bayan JIBWIS ta Jihar Kano ga neman wa’adin mulki na biyu na Gwamna Yusuf, yana mai bayyana kwarin gwiwa cewa wasu shekaru hudu za su bai wa gwamnatin damar kara fadada ci gaba, fadada gyare-gyaren da ake yi da kuma kara inganta jin dadin jama’a.
A jawabinsa, Gwamna Abba Kabir Yusuf ya bayyana godiyarsa ga Farfesa Abdullahi Saleh bisa addu’o’insa, karfafa masa gwiwa da kuma kwarin gwiwarsa kan tsarin ci gaban gwamnati.
Gwamnan ya kuma mika ta’aziyyarsa kan rasuwar matar malamin, yana mai addu’ar Allah Madaukakin Sarki Ya gafarta mata kurakurenta, Ya lullubeta da rahamarsa mara iyaka, Ya ba ta Aljannatul Firdausi.
Gwamna Yusuf ya kuma yaba wa malamai na addinin Islama a fadin Jihar Kano bisa jajircewarsu wajen inganta zaman lafiya, hadin kai, jituwar addini, da kuma bai wa jama’a jagoranci da dabi’a.
