Rundunar ‘yan sanda a jihar Yobe ta tabbatar da mutuwar mutane biyar daga iyali guda a wani hatsarin mota da ya faru a kan hanyar Damaturu zuwa Maiduguri a daren ranar Laraba.
Mai magana da yawun ‘yan sanda a jihar, SP Dungus Abdulkarim, ya tabbatar da lamarin ta wayar tarho ga tashar talabijin ta Channels Television.
Inda ya bayyana cewa hatsarin ya shafi motar Sharon Bus da kuma wata babbar mota kusa da ƙauyen Kukareta, kimanin kilomita 20 daga Damaturu, babban birnin jihar.
Binciken farko ya nuna cewa hatsarin ya faru ne sakamakon gudu mai yawa da kuma wuce gona da iri ba tare da lissafi ba daga direban Sharon Bus, wanda ya yi karo da motar Coca Cola.
Wani dan uwan mamatan, Dahiru Musa Talba, shi ma ya tabbatar da faruwar lamarin a wani sako da ya wallafa a shafinsa na Facebook a ranar Laraba.
Ya bayyana cewa mamatan, wadanda duk ‘yan uwa ne, sun rasu ne a wurin hatsarin, yayin da wasu ‘yan uwa uku suka samu raunuka daban-daban.
Ya kuma bayyana lamarin a matsayin abin takaici mai matuƙar girma tare da nuna alhini kan wannan rashi, inda ya sanar da rasuwar mahaifiyarsa cikin jimami.
Gwamnan jihar, Mai Mala Buni, ta bakin mai taimaka masa kan harkokin yada labarai, Mamman Mohammed, ya jajanta wa iyalan mamatan, yana mai bayyana lamarin a matsayin abin takaici da babban rashi ga al’ummar jihar.
Ya kuma yi addu’ar Allah ya bai wa iyalan mamatan juriyar jure wannan babban rashi da ba zai taɓa mantuwa ba.
