Tsohon kwamishina a Kano ya caccaki gwamnatin NNPP kan rashin gudanar da kyakkyawan kasafin kudin 2025

Tsohon kwamishinan yaɗa labarai da harkokin cikin gida na jihar Kano, Muhammad Garba, wanda ya kasance jagoran ma’aikata na tsohon shugaban jam’iyyar APC ta ƙasa, ya yi suka ga gwamnatin jam’iyyar NNPP kan abin da ya bayyana a matsayin ƙagawar aiwatar da kasafin kuɗi a watanni uku na farko na shekarar 2025.

Kalaman Garba ya zo ne a matsayin mayar da martani ga wani nazari na kasafin kudin da jaridar SolaceBase da ke wallafa a kafar yada labarai ta internet ta wallafa, wanda ya nuna cewa muhimman sassa kamar albarkatun ruwa, kiwon lafiya, da ilimi sun samu kasa da kashi 40 cikin 100 na kasafin kudin tsakanin watan Janairu zuwa Satumba 2025.

Rahoton ya bayyana cewa ma’aikatar kula da ruwa wadda ta samu N21.1 biliyan ta yi amfani da kaso 13 cikin ɗari kacal, yayin da hukumar ruwa ta Kano da ta karɓi N5.6 biliyan ba ta fara amfani da kuɗin da aka ware ba, alhali matsalar ƙarancin ruwa na ci gaba da ta’azzara a yankuna da dama na jihar.

Garba ya danganta wannan matsalar da barin wasu muhimman ayyuka da aka kammala a baya, ciki har da aikin samar da wutar lantarki na Tiga, tare da ci gaba da biyan KEDCO kuɗaɗe na wutar lantarki, abin da bai amfanar da jama’a ba saboda matsalolin wutar lantarki da ake fama da su.

Karanta: Majalisar dokokin Kano ta yaba wa hukumar KASA kan nasarorin da ta samu, ta yi alkawarin ƙarin tallafin kasafin kuɗi na 2026

A bangaren ilimi, ya bayyana cewa aiwatar da kasafi ya tsaya a kashi 32.2 cikin ɗari a ma’aikatar ilimi, yayin da ma’aikatar ilimi na gaba da sakandare ta samu kaso 7.7 cikin ɗari, duk da ikirarin gwamnati na ɗaukar ilimi a matsayin gaggawa, alhali makarantun cikin gida na fama da ƙarancin kuɗi, cunkoso da rashin kayan aiki.

A bangaren kiwon lafiya, ya bayyana cewa an yi amfani da N7.9 biliyan kacal daga cikin N65.7 biliyan da aka ware, al’amari da ya ba da gudummawa ga bullar cututtuka kamar kwalara da matsalolin haihuwa, tare da nuna damuwa kan yadda wasu ayyukan gine-gine da tituna ke gudana cikin rashin tsari da janyo cikas ga zirga-zirga.

Garba ya gargadi cewa irin wannan ƙarancin aiwatar da kasafi na iya gurgunta sabuwar shawarar kasafin kuɗin Naira Tiriliyan 1 da aka gabatar na 2026, yana mai cewa jihar Kano na bukatar gaskiya, tsari da ingantaccen aiwatar da wajen kasafin kuɗi.