Gabanin zanga-zangar da aka shirya yi a fadin kasar da ake shirin farawa a ranar 1 ga watan Agusta, hukumomin ‘yan sanda na neman cikakkun bayanan masu zanga-zangar.
A yayin da yake zantawa da manema labarai a Abuja ranar Juma’a, babban sufeton ‘yan sandan kasa (IGP), Kayode Egbetokun, ya bukaci dukkanin kungiyoyin da ke shirin shiga muzaharar da su mika bayanansu ga kwamishinonin ‘yan sanda a jihohinsu.
Dalilin da ya sa shi ne zanga-zangar ta kasance cikin lumana.
“Mun amince da ‘yanci da tsarin mulki ya ba ‘yan Najeriya na yin taro da zanga-zangar lumana,” in ji shugaban ‘yan sandan.
Karin labari: Majalisar Wakilan Najeriya ta bawa shugaban Hukumar EFCC kwana 4 ya bayyana gabanta
“Duk da haka, domin kare lafiyar jama’a da zaman lafiya, muna kira ga dukkan kungiyoyin da ke shirin gudanar da zanga-zangar da su yiwa Kwamishinan ‘yan sanda cikakken bayani a jihar da ake son gudanar da zanga-zangar.
“Don sauƙaƙawa zanga-zanga ta yi nasara ba tare da tashin hankali ba, da fatan za su ba da bayanai masu zuwa.
“Ku bayyana hanyoyin zanga-zangar da wuraren taro da tsawon lokacin da ake sa ran gudanar da zanga-zangar da sunaye da bayanan tuntuɓar shugabannin zanga-zangar da masu shirya zanga-zangar.
Karin labari: An sanya ranar zaben kananan hukumomi a Jigawa
IG ya kara da cewa bayanan da ake sa ran daga masu shirya taron sun kuma hada da matakan hana satar mutane daga masu aikata laifuka, da kuma muhimman abubuwan da za’a iya gano wadanda za su iya kawo matsala.
Daukar Mutane
Da yake nuna damuwarsa kan yiwuwar yin garkuwa da masu zanga-zangar, IGP ya bayyana cewa hukumomin ‘yan sanda na bukatar bayanan da suka dace don su kuma gano masu iya tayar da fitina.
Ya nanata kudurin ‘yan sanda na tura isassun ma’aikata da kayan aiki don tabbatar da tsaron lafiyar jama’a, yana mai cewa rundunar na bukatar sanin takamaiman hanyoyi da wuraren da za a gudanar da zanga-zangar domin kaucewa rikici da wasu al’amura ko ayyuka.
Karin labari: ‘Yan sanda sun kama wasu ‘yan bindiga 2 a Katsina
IGP din ya kuma fitar da wasu ka’idoji ga masu zanga-zangar, daga ciki akwai “kafa hanyoyin sadarwa da shugabannin zanga-zangar don magance duk wata damuwa ko matsalolin da ka iya tasowa da rage haɗarin tashin hankali da lalata dukiya, ko wasu ayyukan laifi.
“Muna karfafawa duk masu zanga-zangar da su ba ‘yan sanda hadin kai da bin doka da kyawawan halaye don yin taro cikin lumana don tabbatar da samun nasarar gudanar da ‘yancinsu” in ji shi.
