Gwamnan jihar Kano, Abba Kabir Yusuf, ya umurci jami’ar Bayero ta Kano (BUK) da ta gaggauta dakatar da aikin Rusau da take yi a unguwar Rimin Zakara da ke karamar hukumar Ungogo a jihar, biyo bayan wani mummunan rikici da ya barke tsakanin mazauna yankin da jami’an tsaro, wanda ya yi sanadin mutuwar mutane uku tare da jikkata wasu da dama.
Hakan na kunshe ne cikin wata sanarwa da mai magana da yawun gwamnan, Sunusi Bature Dawakin Tofa ya fitar a ranar Alhamis.
SolaceBase ta ruwaito cewa a ziyarar da Gwamna Yusuf ya kai al’ummar garin, ya gana da iyalan wadanda suka rasu, inda ya jajanta musu tare da bayyana cewa gwamnatin jihar za ta dauki nauyin iyalan mutanen uku da suka rasu.
Ya kuma ba da umarnin a gaggauta biyan kudaden jinya ga duk wadanda suka jikkata tare da samar da kayan abinci don tallafawa iyalan wadanda abin ya shafa.
A cikin nuna jin kai, gwamnan ya bayyana shirin gina sabon masallacin Juma’a a Rimin Zakara a matsayin Sadaqatu Jariya ga rayukan mutane uku da suka rasu.
Bugu da kari, gwamnan ya kaddamar da wani gagarumin shirin ci gaba ga al’umma, wanda ya hada da: hada al’umma da wutar lantarki, Gina rijiyoyin burtsatse masu amfani da hasken rana domin samar da ruwan sha mai tsafta, Samar da cibiyar kula da lafiya a matakin farko domin inganta harkokin kiwon lafiya da samar da hanyar ciyar da abinci domin inganta harkokin sufuri a cikin Rimin Zakara.
Gwamna Yusuf ya yi kakkausan gargadi ga jami’an tsaro kan amfani da harsasai kan ‘yan kasa da ba su ji ba ba su gani ba, yana mai jaddada cewa irin wannan abu ba abu ne da za a amince da shi ba.
Karin karatu: Sarkin Kano na 16 ya ziyarci Al’ummar unguwar Rimin Zakara don yin jaje
Gwamnan ya kafa wani kwamitin bincike domin tabbatar da bin diddigin lamarin, tare da gano musabbabin faruwar lamarin don zakulo wadanda ke da hannu a ciki.
A yayin taron, shugaban al’ummar Rimin Zakara, Baba Habu Mikail, ya nuna matukar godiya ga gwamnan bisa yadda ya nuna tausayi, inda ya bayyana cewa al’umma ba za su taba mantawa da alherinsa ba.
A nasa bangaren, shugaban karamar hukumar Ungogo, Tijjani Amiru, ya yabawa Gwamna Yusuf musamman yadda ya muhimmantar da lamarin, tare da bayyana shi a matsayin shugaba mai ba da fifiko ga rayuwar al’ummarsa.
