Mataimakin shugaban kasa Kashim Shettima a ranar Juma’a ya hori maniyyatan Najeriya da za su gudanar da aikin hajjin 2025 da su kiyaye martaba da mutuncin kasar nan a lokacin zamansu a kasar Saudiyya.
Shettima ya yi wannan gargadin ne a wajen bikin kaddamar da rukunin farko na maniyyata a filin jirgin sama na Sam Mbakwe International Cargo da ke Owerri a jihar Imo.
Shettima ya tabbatar wa Mahajjatan cewa Shugaban kasa Bola Tinubu ya samar da dukkan abubuwan da suka dace don ganin an samu nasarar aikin Hajjin 2025.
Ya ce alkawarin da shugaban kasar ya yi ya nuna alkawarin da gwamnatinsa ta yi da jama’a na karewa, goyon baya, da kuma daukaka kowane dan Najeriya, a kowane fanni na rayuwa.
Don haka ya bukaci hukumar alhazai ta kasa (NAHCON) da duk masu ruwa da tsaki a harkokin aikin hajji da su hada kai don isar da nauyin da ake bukata a kan gwamnati.
Karin karatu: Gwamnatin tarayya za ta dawo da ‘yan Najeriya 15,000 da suka makale a kasashen waje
Shettima ya yabawa Gwamna Hope Uzodinma na Imo, bisa yadda ya inganta yanayin juriya na addini, mutunta juna, da hada kai.
Tun da farko, Sarkin Musulmi kuma Shugaban Majalisar Koli ta Musulunci (NSCIAL), Alhaji Sa’ad Abubakar III, ya yaba wa Uzodinma kan yadda ake ci gaba da hakuri da addini da zaman lafiya a jihar.
”A wannan wurin akwai kiristoci da ma ba muminai da ba su yi imani da Allah ba duk sun zauna a cikin wannan shiri na kasa.
“Ba shiri ne kawai na musulmi ba, na yi imanin wannan muhimmin sako ne ga kowa da kowa cewa idan da gaske muna son kasarmu ta ci gaba dole ne mu mutunta juna,” in ji shi.
Sarkin Musulmi ya jaddada muhimmancin hakuri da juna a addini wajen ciyar da kasa gaba (NAN)
