Sarkin Kano na 16, Khalifa Muhammad Sanusi II, ya jagoranci sallar jana’izar fitaccen malamin addinin Musulunci, Sheikh Kabir Babban Malami Na Madabo, da ya rasu da yammacin ranar Alhamis bayan gajeriyar rashin lafiya.
SolaceBase ta ruwaito cewa marigayin ya rasu a gidansa da ke unguwar Madabo a birnin Kano yana da shekaru 85, kuma ya bar mata uku, ‘ya’ya 26, jikoki masu yawa.
An gudanar da sallar jana’izar ne a fadar Sarkin Kano da ke Kofar Kudu, inda dubban jama’a suka halarta, ciki har da ‘yan uwa, almajirai, malaman addini, da al’ummar gari don yin bankwana da marigayin.
Sheikh Kabir Babban Malami ya kasance ɗaya daga cikin manyan mambobin majalisar masarautar Kano kuma malami ne da aka karrama saboda zurfin iliminsa a fannonin Qur’ani da Hadisi.
A tsawon shekaru, ya shahara wajen koyarwa, bayar da fatawoyi, da kuma ba da gudunmawa wajen ilmantar da dalibai da malamai da dama a fadin jihar Kano da ma bayan ta.
Rasuwarsa ta bar babban gibi a tsakanin al’ummar Musulmi da ke daraja ilimi da koyarwar addini.
