Babbar Kotun Tarayya (FHC) a ranar Asabar ta sanar da rasuwar wani alkali mai ci, Mai Shari’a Mohammed Yunusa na sashin shari’a na Kano.
Darakta na Yada Labarai na FHC, Mrs Catherine-Oby Christopher, ce ta bayyana haka a cikin wata sanarwa a Abuja.
Mai Shari’a Yunusa ya rasu ranar Alhamis bayan gajeriyar jinya a Cibiyar Kiwon Lafiya ta Jihar Kano.
A cewar sanarwar, an yi jana’izarsa bisa ga koyarwar addinin Musulunci.
“Mai Shari’a M. N. Yunusa fitaccen alkali ne, masanin shari’a wanda ya yi aiki da himma, gaskiya, da jajircewa wajen gudanar da shari’a.”
Sanarwar ta ce gudummawar da marigayi ya bayar ga Bench da fannin shari’a za a ci gaba da tunawa da ita cikin kauna.
Ta ce abokan aikinsa, lauyoyin waje, ma’aikatan kotu, da duk wadanda suka samu damar aiki tare da shi za su ci gaba da daraja gudummawar tasa.
“Babban Alkalin alkalai, alkalai koruna, jami’an gudanarwa, da ma’aikatan Babbar Kotun Tarayya suna mika ta’aziyya ga iyalansa na kusa.
“Muna rokon Allah Madaukakin Sarki ya ba su karfin hali da juriyar jure wa wannan babbar rashi da ba za a iya maye gurbin sa ba.
“Allah Madaukakin Sarki ya gafarta masa kurakuran sa kuma ya sa shi Aljannatul Firdaus,” in ji sanarwar. (NAN)
