Shugabancin jam’iyyar APC na kasa ya kuduri aniyar kafa wani karamin kwamiti kan kasafin kudi tare da samar da tsare-tsaren da suka dace don gudanar da babban jam’iyyar da aka shirya yi a watan Fabrairu.
Sanata John Akpanudoedehe, sakataren jam’iyyar APC na kasa mai rikon kwarya ne ya bayyana haka a lokacin da yake zantawa da manema labarai a karshen taron sirri da kwamitin ya gudanar a sakatariyar jam’iyyar ta kasa yau Litinin a Abuja.
Ya ce matakin na daga cikin kudurori da aka cimma a taron, inda aka yi nazari kan ayyukan jam’iyyar a cikin shekara daya da ta gabata tare da tattaunawa kan al’amuran kasa da na jam’iyya daban-daban.
Ya taya shugaban kasa Muhammadu Buhari murnar aiwatar da wasu tsare-tsare masu amfani da dama wadanda suka yi tasiri ga rayuwar ‘yan Najeriya.
Akpankudohede ya ce taron ya samu amincewar gwamnatin Buhari, inda ya ce jam’iyyar APC za ta ci gaba da tattaunawa da masu ruwa da tsaki kan al’amuran da suka shafi kasa da kuma ‘yan Nijeriya baki daya.
Taron ya tattauna kan babban taron kasa da aka shirya kuma ya yanke shawarar kafa wani karamin kwamiti kan kasafin kudi da sauran tsare-tsaren da suka dace don babban taron kasa,” inji shi.
Sakataren jam’iyyar APC ya godewa ‘yan Najeriya kan yadda suke ci gaba da marawa jam’iyyar APC da gwamnatin tarayya goyon baya tare da yi musu fatan alheri a lokutan bukukuwan da suka gabata.
Kamfanin Dillancin Labarai na Najeriya NAN ya ruwaito cewa Buhari ya amince da watan Fabrairu don gudanar da babban taron kasa.
Ana sa ran za a zabi sabon kwamitin ayyuka na kasa a babban taron kasa wanda zai karbi ragamar tafiyar da harkokin jam’iyyar.
