Babban janar na Sudan ya ayyana dokar ta -baci, da kuma rushe hukumomin da ke jagorantar sauyin dimokuradiyyar kasar.
Haka kuma ya ba da sanarwar kafa sabuwar gwamnati bayan sojoji sun tsare shugabannin farar hula a ranar Litinin a cikin abin da masu fafutuka suka yi tir da shi a matsayin “juyin mulki”.
Sanarwar Janar Abdel Fattah al-Burhan a cikin wani jawabi da aka watsa ta gidan talabijin ya zo ne bayan da sojoji suka tsare jiga-jigan gwamnatin da ke jagorantar mika mulki zuwa mulkin dimokuradiyya tun daga watan Afrilu na shekarar 2019 da aka hambarar da gwamnatin Omar al-Bashir.
Burhan yace “Don gyara tafarkin juyin juya hali, mun yanke shawarar ayyana dokar ta -baci a duk fadin kasar … rusa majalisar mulkin rikon kwarya, da rusa majalisar ministoci,”.
Bayanin nasa ya zo ne a yayin da rikici ya barke a Khartoum babban birnin kasar, inda sojoji suka yi ta harbe -harbe kan mutanen da suka fito kan tituna don nuna adawa da karbe ikon.
Rikicin ya ta’allaka ne a wajen hedikwatar sojojin a babban birnin kasar sa’o’i bayan sojoji sun tsare Firayim Minista Abdalla Hamdok da ministocin gwamnatinsa da membobin farar hula na majalisar da ke mulkin Sudan, in ji ma’aikatar yada labarai.
An tafi da su ne bayan “sun ki goyon bayan juyin mulkin”, kamar yadda ta bayyana a shafin Facebook.
An katse sadarwa na Intanet a duk faɗin ƙasar da sanyin safiya kuma an rufe manyan hanyoyi da gadoji zuwa Khartoum, kafin sojoji su mamaye hedkwatar gidan rediyon gwamnatin Sudan a cikin tagwayen birnin Omdurman, in ji ma’aikatar.
