Majalisar Sarkin Musulmi ta Sokoto ta ayyana ranar Juma’a, 20 ga watan Maris, 2026 a matsayin ranar farko ta watan Shawwal 1447 hijira, wanda ke nuna bikin karamar Sallah a fadin Najeriya, sakamakon rashin ganin jinjirin sabon wata ba.
Sanarwar ta fito ne cikin wata takarda da kwamitin ba da shawara kan harkokin addini na majalisar, tare da hadin gwiwar kwamitin ganin wata na kasa suka fitar a ranar Laraba.
Takardar sanarwar na dauke da sa hannun shugaban kwamitin, Sambo Wali Junaidu.
Sanarwar ta bayyana cewa ba a samu sahihin rahoto daga kowanne bangare na kasar da ya tabbatar da ganin jinjirin watan Shawwal a ranar Laraba 18 ga watan Maris ba, wanda ya yi daidai da ranar 29 ga watan Ramadan.
Saboda haka, an ware ranar Alhamis 19 ga watan Maris, 2026 a matsayin ranar 30 ga watan Ramadan 1447 hijira, bisa tsarin kalandar Musulunci.
Bisa wannan rahoto, Sarkin Musulmi na Sokoto kuma shugaban koli na majalisar koli ta harkokin addinin Musulunci ta Najeriya, Muhammad Sa’ad Abubakar, ya amince da ayyana ranar Juma’a a matsayin ranar karamar Sallah.
Ya taya al’ummar Musulmi murnar kammala azumin Ramadan cikin nasara, tare da bukatar su ci gaba da riko da ibada bayan watan mai alfarma.
Haka kuma ya bukaci Musulmi da sauran ‘yan kasa da su ci gaba da yin addu’o’i domin zaman lafiya, hadin kai da ci gaban kasa, musamman a wannan lokaci da kasar ke fuskantar kalubalen tattalin arziki da tsaro.
Wannan sanarwa ta tabbatar da hadin kai wajen gudanar da bikin karamar Sallah a fadin Najeriya, tare da nuna rawar da majalisar koli ta harkokin addinin Musulunci ke takawa wajen daidaita al’amuran addini a kasa baki daya.
Kalandar Musulunci wadda ta dogara da zagayowar wata, na bukatar ganin jinjirin sabon wata domin sanar da karshen Ramadan, kuma a Najeriya ana tsara wannan tsari ne ta hanyar kwamitoci da ke karkashin jagorancin majalisar Sarkin Musulmi.
