Hukumar bayar da agajin gaggawa ta jihar Legas (LASEMA), a ranar Alhamis, ta tabbatar da mutuwar ma’aikatan wurin uku a wani gini da ya rufta a Estate Arowojobe da ke yankin Maryland a jihar.
Babban sakatare na hukumar, Dakta Olufemi Oke-Osanyintolu, ya tabbatar da hakan a wata sanarwa da ya rabawa manema labarai.
Ya ce lamarin ya faru ne a lamba 13, Wilson Mba St., Aowojobe Estate, Maryland, a jihar Legas.
Ya ce maza ukun da aka zakulo sun mutu a ginin ma’aikatan wurin ne.
Karin labari: Hukumar NDLEA ta kama wani mutum da ake nema ruwa a jallo
“Hukumar ta samu kiran gaggawa game da wani gini da ya ruguje a adireshin da ke sama da misalin karfe 3:49 na safe.
“Hakan ne ya sa tawagar jami’an hukumar ta dauki matakin gaggawar zuwa wurin da lamarin ya faru da karfe 3:58 na safe.
“An gano cewa wasu filaye guda uku da ake ginawa sun ruguje.
Daya daga cikin wadanda aka ceto ya jikkata a wurin.
“An fara gudanar da bincike da ceto nan take, an kuma gano uku da suka mutu, an ceto biyu da ransu, sannan an ceto wani babba da ya makale a karkashin baraguzan ginin,” in ji shi.
Karin labari: Hukumar DSS ta kama masu fataucin yara a Kano
Ya kara da cewa an yi nasarar ceto mutanen ne ta hanyar kokarin hukumar LASEMA da hukumar kashe gobara ta jihar Legas.
“Dukkan mutanen shida ma’aikatan wurin ne.
“Suna samun kulawa kafin a kai ga asibiti inda aka tuntubi Sashen Kula da Lafiyar Muhalli na Jiha don gano ragowar mutanen uku da suka mutu.
“Tawagar hadakar jami’an hukumar da hukumar kashe gobara da ‘yan sandan Najeriya suna aiki a wurin.
“An tura na’urar tona na LASEMA domin kara kaimi wajen bincike da ceto,” inji shi kamar yadda NAN ta wallafa.
