Gwamnan jihar Kaduna, Nasir El-Rufai, a ranar Talata ya bayyana dalilin da ya sa gwamnonin jam’iyyar APC suka rabu kan lokacin gudanar da babban taron jam’iyya APC.
El-Rufai ya bayyana haka ne bayan gwamnonin jam’iyyar APC sun gana da shugaban kasa Muhammadu Buhari domin yi masa bayani kan batutuwan da ke tattare da babban taron.
An shirya gudanar da taron ne a wannan Asabar, sai dai kwamitin riko na jam’iyyar a ranar Litinin ya sanar da dage taron zuwa ranar 26 ga Maris.
Kwamitin ya fitar da sabon jadawalin yadda taron zai kasance, inda za a fara gudanar da ayyukan babban taron a ranar 24 ga watan Fabrairu.
A ranar Laraba 9 ga watan Maris ne za a fara sayar da fom ga masu neman tsayawa takarar mukamai a ranar Juma’a 11 ga watan Maris.
Bayan ganawar da shugaban kasar a ranar Talata, El-rufai ya amince cewa taron da aka shirya ya raba kan gwamnonin APC.
“Eh, an raba mu. An raba mu game da lokacin taron. To, akwai wasu gwamnonin da suke ganin ya kamata mu janye taron har sai mun warware dukkan matsalolin da muke dasu a wasu jihohin. Kamar yadda kuka sani, akwai batutuwa a wasu jihohin. Don haka wasu gwamnonin suna da ra’ayin cewa mu jira sai an magance duk wannan (wadannan),” kamar yadda ya shaida wa manema labarai na fadar gwamnatin jihar.
Sai dai gwamnan ya ce rashin jituwar “ba ta samo asali daga wata manufa ko son kai ba.”
“Don haka, an sami bambance-bambancen ra’ayi game da lokaci. Wasu daga cikinmu na cewa Kundin Tsarin Mulki ya ba mu damar yin babban taro ko da jihohi uku ko hudu suna da batutuwan da ba a warware su ba, wasu kuma na cewa a’a, mu gama duk wani sulhu, mu yi wannan taron.
“Bayan haka, babu ƙayyadaddun lokacin taron muddun mun yi shi kafin lokacin zaɓen firamare. To wannan shi ne bambancin. Wannan shi ne abin da kafafen yada labarai suka kira gwamnonin da suka rabu.
‘A tsarin dimokuradiyya, babu yadda za a yi ka samu gwamnoni 22 tare da mataimakin gwamnan jihar Anambra su amince da kowane batu. Za mu iya samun bambance-bambance.
“Amma bayan taron da muka yi a daren jiya, don yin shawarwari kan shawarwarin da kwamitin riko na kasa ya bayar, da kuma bayanin da muka yi da mai girma shugaban kasa a yau, dukkanmu muna kan hanya daya.
“Mun amince da tsarin shiyya-shiyya na dukkan shiyyoyin siyasa guda shida, shiyyoyin Arewa za su dauki matsayin da shiyyar Kudu ke da su a cikin shekaru takwas da suka wuce, akasin haka. Don haka mai sauqi qwarai, daidaito da daidaito.
