Hukumar bayar da agajin gaggawa ta ƙasa NEMA ta karɓi ’yan Najeriya 708 da suka makale a birnin Yamai na jamhuriyar Nijar a ranar Litinin.
Shugaban ayyuka na ofishin NEMA na Kano, Dakta Nura Abdullahi, ya bayyana hakan yayin da yake yi wa manema labarai bayani jim kaɗan bayan karɓar waɗanda aka dawo da su a filin jirgin sama na Malam Aminu Kano da ke Kano domin tantance su.
Kamfanin dillancin labarai na ƙasa NAN ya rawaito cewa an kawo waɗanda aka dawo da su cikin bas-bas 12 masu alfarma, inda suka iso da misalin ƙarfe 4:08 na yamma, kuma a halin yanzu ana ci gaba da tantance su.
Wadanda aka dawo da su sun haɗa da maza da yara 292 da mata da yara 416 daga sassa daban-daban na Najeriya, musamman daga jihohin Katsina, Kano, Jigawa, Benue, Borno, Yobe, Zamfara, Kaduna, Kogi da Neja.
Abdullahi ya ce ma’aikatar harkokin wajen ƙasa ce ta dawo da su, inda ya ƙara da cewa an ba su abinci kuma an shirya musu matsuguni na wucin gadi.
Ya ce an kuma ba su barguna, gidan sauro da kayan mutunci da suka haɗa da kayan tsafta, zannuwa, audugar mata da sauran muhimman abubuwa, sannan zuwa safiyar gobe bayan kammala tantance su za a kai su jihohinsu daban-daban.
Ya ƙara da cewa ma’aikatan jinya na ƙungiyar agajin gaggawa ta Red Cross ta Najeriya suna wurin domin kula da lafiyar marasa lafiya daga cikinsu, yayin da waɗanda ke da matsananciyar larura za a tura su zuwa cibiyoyin lafiya na jihohi.
Shi ma jami’in kula da aikin a Kano na hukumar kula da ’yan gudun hijira da bakin haure da mutanen da suka rasa muhallansu ta ƙasa, Hajiya Luba Liman, ta bayyana wannan aiki a matsayin haɗin gwiwar gwamnati gaba ɗaya domin kwashe ’yan Najeriya da suka makale.
Ta ce gwamnatin tarayya ce ta jagoranci dawo da su tare da haɗin gwiwar ofishin jakadancin Najeriya da ke Yamai da kuma ma’aikatar harkokin wajen ƙasa, inda ta bayyana cewa wannan dawowa na son rai ne domin da yawa daga cikinsu ba su da halin dawowa da kansu.
Wani daga cikin waɗanda aka dawo da su, Malam Kamalu Abdullahi daga jihar Kaduna, ya ce ya shafe shekaru 12 a Yamai kafin tashin hankalin da ya tilasta masa guduwa, inda ya ce gidansa da na wasu ’yan Najeriya sun kone, sannan aka kai masa hari tare da tilasta masa barin ƙasar.
Haka kuma, Rabi’a Inusa daga jihar Jigawa, wadda ke da yara uku, ta ce matsalolin iyali ne suka sa ta yi tafiya zuwa Yamai tare da ’ya’yanta biyu, inda ta kwashe watanni biyar cikin wahala, tana kwana a kan titi kafin daga bisani ta shiga sansanin masu dawowa gida.
Kamfanin dillancin labarai na ƙasa NAN ya kuma rawaito cewa da dama daga cikin waɗanda aka dawo da su, musamman mata da yara, sun iso cikin yanayi na wahala, yayin da wakilan NEMA da hukumar kula da ’yan gudun hijira da bakin haure da mutanen da suka rasa muhallansu da SEMA na Kano da kuma hukumar shige da fice ta Najeriya suka halarci karɓar su.
