Yunkurin wata mata, Ihensekhien Miracle Obehi da ta yi shiga sanye da hijabi don fitar da hodar iblis da ta boye a al’aurarta da cikinta da kasan jakar hannunta zuwa Iran ya ci tura sakamakon fadawa hannun jami’an hukumar yaki da fataucin miyagun kwayoyi (NDLEA) a filin jirgin sama na Port Harcourt a jihar Rivers.
Jaridar SolaceBase ta rawaito cewa Obehi, wadda ke sanye da hijabi don kawar da hankalin jami’an tsaro, an kama ta a filin tashi da saukar jiragen sama na Port Harcourt a ranar Lahadi, 3 ga Mayu, 2025, a lokacin da take kokarin shiga jirgin Qatar Airline zuwa Iran ta hanyar Doha, biyo bayan sahihan bayanan sirri.
Wata sanarwa da daraktan hukumar ta NDLEA sashin sadarwa da wayar da kan jama’a a Abuja, Femi Babafemi, ya fitar a ranar Lahadin da ta gabata, ta ce a binciken da take yi, an gano matar ta saka hodar iblis guda uku a al’aurarta, da wasu manya-manyan fakiti guda biyu da ta boye a cikin jakar hannunta yayin da ta hadiye kwalaye 67 na maganin.
Hakan ya sa aka sanya mata ido a hankali sannan bayan fitar hudu da ta shafe kwanaki, ta fitar da kulluna 67 na cikinta. Ta yi ikirarin cewa za ta hadiye kwalaye 70 na hodar iblis amma bayan ta sha 67, ta kasa hadiye sauran ukun sannan ta yanke shawarar saka su a cikin al’aurarta. Jimlar nauyin kayan ukun da aka boye a sassa daban-daban na jikinta ya kai kilogiram 2.523.
Karin karatu: NDLEA ta gano hodar ibilis da aka so yin safararta zuwa Saudiyya cikin littattafan addini
Hakazalika, jami’an NDLEA a filin jirgin sama na Murtala Mohammed, MMIA, Ikeja Legas a ranar Juma’a 9 ga watan Mayu, sun tare wani matashi dan kasar Birtaniya mai shekaru 22, Campell Kaizra Kofi Johannes Slifer, wanda ya taho daga kasar Thailand ta Doha a jirgin Qatar Airways dauke da akwatuna biyu dauke da Loud 35, wani nau’in wiwi mai nauyi 3.6.
Campell wanda ya yi ikirarin cewa sau biyu ana tuhumarsa da laifin safarar miyagun kwayoyi da kuma fashi a kasar Burtaniya, ya ce an dauke shi aiki ne a Landan domin ya tafi kasar Thailand domin karbar haramtattun kayayyaki ya kuma kawo su Najeriya.
A jihar Neja, jami’an hukumar ta NDLEA da ke aiki da bayanan sirri a ranar Laraba 7 ga watan Mayu, sun kama wata mota kirar mai lamba ABJ 693 XU da wasu motoci uku dauke da buhuna 246 na skunk, wata irin tabar wiwi mai nauyin kilogiram 3,047 a kan hanyar Suleja zuwa Kaduna. Mutane hudu da aka kama tare da baje kolin sun hada da: Christopher Onyema, 47; Benedict Etineruba Young, 54; Chukwudi Ujue Jerry, 30; da Mohammed Abdullahi Danasabe. Baya ga motar ma, akwai wasu motoci uku da aka kwato daga hannun wadanda ake zargin sun hada da: Motar Honda Odyssey mai lamba YAB 667 CZ; motar Golf mai lamba GWA 125 TQ da motar Honda Odyssey mai lamba ABJ 230 CN.
A Oja Amukoko da ke unguwar Ijora a Legas, an kama wasu mutane biyu: Eze Chekube Emmanuel da Ike Samuel Chinyerem a ranar Alhamis, 8 ga watan Mayu, wadanda jami’an NDLEA suka kama tare da kwayoyin tramadol 109,914, swinol da nitrozepam.
A yayin da aka kwato skunk 52.5kg daga hannun mutane biyu: Lukman Sabo Umar, 23, da Tukur Ammadu, 20, a cikin wata motar bas a Gwantu, karamar hukumar Sanga, jihar Kaduna a ranar Talata, 6 ga watan Mayu, jami’an NDLEA da ke sintiri a hanyar Bode Sa’adu- Jebba, jihar Kwara a ranar Litinin, 5 ga Mayu tare da kwaya 4 225mg.
A jihar Bauchi, jami’an hukumar NDLEA da ke sintiri a kan hanyar Bauchi zuwa Gombe a ranar Talata 6 ga watan Mayu, sun kama wata mota kirar Toyota Tundra jeep mai lamba RBC 111 DW dauke da skunk 526 mai nauyin kilogiram 505 tare da wasu mutane biyu: Isaac Onugure mai shekaru 37 da Ikechukwu Peter mai shekaru 44.
An gano jimillar keji 31 dauke da lita 775 na maganin codeine daga hannun mutane biyu.
Hafizu Isa Uman mai shekaru 34 da Ismail Shehu mai shekaru 48 a lokacin da jami’an NDLEA suka kai samame a maboyarsu dake unguwar Rijiyar Zaki dake Kano a ranar Asabar 10 ga watan Mayu, yayin da aka gano kaya mai nauyin kilo 1.1 da aka boye a cikin matashin kai daga kasar Thailand a ranar Talata, 6 ga watan Mayu, jami’an NDLEA suka kama a wani kamfanin jigilar kaya dake Legas.
