An samu fitowar masu jefa kuri’a a rumfunan zabe daban-daban a Jihar Ekiti a ranar Asabar yayin da zaben gwamna na musamman ya fara cikin tsari, yayin da jami’an zabe suka isa wuraren kada kuri’a da kayan zabe akan lokaci.
Yawancin jami’an wucin gadi sun isa da wurin domin fara shirya aikin, yayin da masu jefa kuri’a ma suka fito da yawa kafin fara tantancewa da jefa kuri’a.
Tantancewa ta fara da misalin karfe 8:00 na safe a yawancin rumfunan zabe, inda jami’an zabe ke kula da masu jefa kuri’a cikin tsari.
Jami’an tsaro sun bayyana a fili a rumfunan zabe da wurare masu muhimmanci a mazabu daban-daban domin tabbatar da zaman lafiya. Wakilanmu a fadin jihar sun ruwaito cewa ba a sanya jami’an soja da yawa ba, hakan ya bai wa mazauna yankin da masu jefa kuri’a damar zirga-zirga cikin sauki ba tare da tsaiko ba.
Nauyin da jami’an zabe da jami’an tsaro suka nuna ya taimaka wajen samun yanayi cikin natsuwa, yayin da masu jefa kuri’a ke jeruwa a layi da hakuri domin gudanar da hakkin su na kasa.
Hakazalika lokacin da muke shirya wannan rahoton, jefa kuri’a ta fara a rumfunan zabe da yawa, ba tare da wani babban lamari ba.
Masu sanya ido sun bayyana fatan cewa yanayin zaman lafiya da bin ka’idojin zabe zai habaka amincin sakamakon zaben.
