Wata babbar kotun majistare da ke Kano ta dage zamanta zuwa ranar 9 ga watan Fabrairu, 2022, a shari’ar da ake yi wa Abdulmalik Tanko da wasu abokansa biyu bisa zargin kisan wata yarinya ‘yar shekara biyar Hanifa Abubakar.
Solacebase ta ruwaito cewa Tanko mai shekaru 37 tare da Hashimu Isyaku mai shekaru 37 da Fatima Musa mai shekaru 26, an gurfanar da su a gaban kotu bisa wasu tuhume-tuhume guda hudu da suka hada da kisan kai, hada baki, garkuwa da mutane da tsare wadda aka sace.
A yayin da aka ci gaba da shari’ar a ranar Laraba, lauyan masu shigar da kara da kuma darakta mai shigar da kara na jihar Kano, Barista Aisha Mahmoud, sun sanar da kotun cewa sun shigar da kara a gaban babbar kotun Kano.
“Mun shigar da tuhumar ne saboda laifin da ake zargin wadanda ake tuhuma da aikatawa bai dace da wannan kotu ba.
“Babban Alkalin Kano ya mika karar zuwa babbar kotu mai lamba 5. Muna neman wata rana da za mu kawo karshen rahoton farko a gaban wannan kotun”.
Idan dai za a iya tunawa, Abdulmalik Tanko, kasancewarsa mamallakin kwalejin koyar da yara ta Nobel da ke Kano, ya hada baki da wasu biyun tare da sace Hanifa.
A baya Mahmoud ya yi zargin cewa Tanko ya yi garkuwa da Hanifa a gidansa da ke Tudun Murtala Quarters Kano har tsawon kwanaki shida sannan ya kashe ta da gubar bera sannan ya saka gawar ta cikin buhu sannan ya binne ta a wani kabari mara zurfi.
“Wadanda ake tuhumar sun karbi kudin fansa N100,000 daga cikin Naira miliyan 6 da aka nema a baya.”
Babban Alkalin Kotun, Muhammad Jibril, ya bayar da umarnin a tsare wadanda ake kara a gidan gyaran hali sannan ya dage ci gaba da shari’ar har zuwa ranar 9 ga Fabrairu, 2022 don ci gaba da ambata.
