Gogaggen ɗan jarida kuma ɗaya daga cikin ƴan Najeriyan da ake ji da su a fannin aikin jarida, Peter Enaharo, ya koma ga mahaliccin sa. Jaridar Punch ta kawo rahoto cewa Enahoro, wanda aka fi sani da Peter Pan, ya mutu ne a birnin Landan na ƙasar Burtaniya a ranar Litinin yana da shekara 88 a duniya.
Labarin mutuwar ta sa na ƙunshe ne a cikin wata ƴar gajeruwar sanarwa da fitacciyar ƴar jarida mace a ƙasar nan Ms Bunmi Sofola, ta fitar.
‘Ina baƙin cikin sanar da mutuwar gogaggen ɗan jaridar mu, Peter Enahoro ‘Peter Pan’ yau a birnin Landan yana da shekara 88 a duniya.’
“Wanda aka fi sani da sunan ‘Peter Pan’ saboda rubutun sharhin da ya ke yi a mujallar New African.
‘Ya zama babban ɗan jarida daga nahiyar Afrika wanda aka fi sani a duniya.”
An haife shi a ranar 21 ga watan Janairun 1935, Enahoro ya kasance ɗan jarida ne, mawallafi, ɗan kasuwa sannan mai buga littattafai.
Enahoro yana daga cikin waɗanda suka assasa harkar watsa labarai a Najeriya inda ya zama editan Daily Times yana da ƙananan shekaru. Marigayin ya yi karatu a makarantar gwamnatin tarayya ta Ughelli, cikin jihar Delta ta yanzu. Sannan ya yi zamani tare da farfesan turanci na farko a nahiyar Afirika, JP Clark.
