Daga: Sunusi A. Dantalata Fagge
Majalisar dokokin jihar Kano ta amince da sake dokar majalisar masarautun jihar ta shekarar 2019 da kuma dokar gyaran masarautar Kano ta 2023 domin yin gyara.
Hakan ya biyo bayan wani kudiri na gaggawa da muhimmancin jama’a da shugaban masu rinjaye na majalisar kuma mamba mai wakiltar mazabar Dala Alhaji Lawan Hussaini Chediyar ƴan Gurasa ya gabatar yayin zaman majalisar na ranar Talata wanda shugaban majalisar Jibril Isma’il Falgore ya jagoranta.
SolaceBase ta ba da rahoton cewa shugaban masu rinjaye na neman amincewar ‘yan majalisa don kiran dokokin don gyarawa.
Karin labari: Kona Masallaci: Gwamnan Kano ya sha alwashin daukar mataki da yin adalci
A nasa bangaren dan majalisar mai wakiltar mazabar Dawakin Kudu Shu’aibu Rabi’u ya goyi bayan kudirin.
An fara gyara wannan doka ne a shekarar 2019 a daidai lokacin da ake takun saka tsakanin Gwamna Abdullahi Umar Ganduje da Sarki Muhammadu Sanusi.
Canjin ya kai ga raba Masarautar Kano zuwa masarautu biyar da suka hada da Rano, Karaye, Gaya, da Bichi, tare da nada sarakunan daraja ta daya ga wadannan sabbin yankuna da aka kafa.
Karin labari: ‘Yan bindiga sun sace mutum 16 yayin da ‘Yan sanda suka ceto mutum 4 a Abuja
Wannan sake fasalin ya haifar da tsige Sarki Sanusi daga mukaminsa.
Sai dai nasarar zaben da Gwamna Abba Kabir Yusuf ya samu a kwanakin baya, wanda ya yi yakin neman zabensa na maido da tsarin Masarautar Kano, ya sake farfado da yunkurin dawo da Sarki Sanusi.
Wata daya kafin Gwamna Abba Kabir Yusuf ya hau mulki, Sanata Rabi’u Musa Kwankwaso, shugaban jam’iyyar NNPP, mai mulki a Kano, ya nuna cewa za a sake duba batun masarautun.
Karin labari: Ma’aikatan NiMet sun janye shirin fara yajin aikin kungiyar kwadago
A yayin jawabin da ya yi wa jama’a, Kwankwaso ya jaddada kudirin jam’iyyar na yin bitar sauye-sauyen da aka yi wa tsarin masarautu: “Mun yi yakin neman zabe kuma mun shahara a Najeriya, musamman a Kano.
“Abin da muka nuna wa jama’a shi ne da yardar Allah duk ayyukan alheri da muka fara a lokacin da muke gwamnati. Wannan gwamna (Abba Kabir Yusuf) da tawagarsa za su dora daga inda muka tsaya.”
Kwankwaso ya ci gaba da lura da sarkakiyar lamarin, inda ya ce za a sake duba yadda aka raba masarautun. “Wadanda Allah ya yi shugabanni yanzu za su yanke shawara kan mataki na gaba da matakin da za su dauka.
Karin labari: ‘Yan gwadago za su halarci taron tattaunawa a kan mafi karancin albashi
Za su sake duba shi kuma su tantance abin da ya dace a yi. Baya ga batun sauya sarkin, yanzu an raba masarautu gida biyar. Za a kuma sake duba duk wadannan,” inji shi.
Ya bayyana kwarin gwiwar cewa Gwamna Yusuf zai magance wadannan kalubale yadda ya kamata, “Muna da yakinin Allah zai baiwa gwamna hikimar da ya zo ya warware matsalolin da aka dasa a jihar Kano domin kowa ya zauna lafiya a jihar Kano.”
A yayin da ake ci gaba da gudanar da aikin majalisar, yuwuwar gyara dokar nadin sarautar na wakiltar wani gagarumin ci gaban siyasa a jihar Kano, wanda ke da matukar tasiri ga tsarin masarautun gargajiya da tsarin shugabanci a yankin.
