Gwamnan Jihar Plateau, Caleb Mutfwang, ya fice daga jam’iyyar PDP a hukumance, inda ya janye kasancewarsa daga jam’iyyar da ya tsaya takara a karkashinta.
Gwamnan ya bayyana hakan ne ta cikin wata wasiƙa da ya rubuta ranar 29 ga Disamba, 2025, wadda ya aikawa shugaban jam’iyyar PDP na mazabar Ampang West, Dasjak Sunday Longyol.
A cikin wasiƙar, ya bayyana cewa matakin da ya dauka ya samo asali ne daga bukatar nemo wata sabuwar kafa ta siyasa da za ta ba shi damar aiwatar da shugabanci nagari ga al’ummar Jihar Plateau.
Ya amince da rawar da jam’iyyar PDP ta taka a rayuwarsa ta siyasa, tare da nuna godiya bisa damar da jam’iyyar ta ba shi na shiga da kuma taka rawa a tsarin dimokuradiyyar Najeriya.
A cewarsa, ficewarsa daga jam’iyyar ta samo asali ne daga burinsa na shugabanci mai ma’ana, hangen nesa mai inganci, da kuma inganta ayyukan hidima ga jama’a.
Haka kuma, ya gode wa shugabannin jam’iyyar, mambobinta da magoya bayanta bisa goyon baya da amincewar da suka ba shi a tsawon lokacinsa a PDP.
Wasiƙar, wadda gwamnan da kansa ya sanya wa hannu, ta tabbatar da cewa murabus ɗin nasa ya fara aiki nan take ba tare da wani jinkiri ba.
Gwamna Mutfwang bai bayyana jam’iyyar siyasar da yake shirin shiga ba bayan ficewarsa daga PDP.
