Hukumar Zaɓe Mai Zaman Kanta ta Ƙasa (INEC) ta ayyana Christopher Maikalangu na jam’iyyar APC a matsayin zaɓaɓɓen shugaban karamar hukumar Abuja Municipal Area Council (AMAC).
Jami’in tattara sakamakon zaɓen na AMAC, Farfesa Andrew Abue, ya bayyana cewa Maikalangu, wanda shi ne shugaban AMAC mai ci a yanzu, ya samu ƙuri’u 40,295 cikin jimillar ƙuri’u ingantattu 62,861, inda ya samu mafi yawan ƙuri’u a zaɓen.
Kamfanin dillancin labarai na ƙasa NAN ya rawaito cewa jam’iyyar ADC ta zo ta biyu da ƙuri’u 12,109, yayin da PDP ta samu ƙuri’u 3,398.
An bayyana cewa adadin ƙuri’un da aka ƙi amincewa da su ya kai 2,336, jimillar ƙuri’u ingantattu 62,861, yayin da jimillar duk ƙuri’un da aka kaɗa suka kai 65,197.
Adadin masu rajista a AMAC ya kai 837,338, yayin da adadin waɗanda aka tantance domin kaɗa ƙuri’a ya kai 65,676.
Sakamakon ya nuna cewa sauran jam’iyyu 12 da suka fafata sun samu ƙuri’u kamar haka: Agbon Vaniah na Accord ya samu 403; Nemiebika Tamunomiesam na Action Alliance ya samu 108; Paul Ogidi na ADC ya samu 12,109; Richard Elizabeth na ADP ya samu 588; Christopher Maikalangu na APC ya samu 40,295; Eze Chukwu na APGA ya samu 1,111; Chukwu Promise na APM ya samu 122; Ugoh Michael na APP ya samu 32; Thomas Happiness na Boot Party ya samu 43; Jibrin Alhassan na NNPP ya samu 1,694; Samson Usani na NRM ya samu 73.
Dantani Zanda na PDP ya samu 3,398; Iber Shimakaha na PRP ya samu 90; Simon Obinna na SDP ya samu 2,185; Madaki Robert na YPP ya samu 421; yayin da Swani Buba na ZLP ya samu 189.
Wakilan jam’iyyu da suka halarci cibiyar tattara sakamako sun sanya hannu a takardun sakamakon, ciki har da wakilan ADC, APC, APGA, YPP da NNPP.
Wakilin tattara sakamakon na APC, Gambo Babale, ya bayyana tsarin zaɓe da tattara sakamako a matsayin abin dogaro, yana mai cewa sakamakon ya nuna APC na shirin samun nasara a zaɓuɓɓuka masu zuwa.
Haka kuma wakilin YPP a cibiyar tattara sakamako, Abdullahi Ibrahim, ya bayyana tsarin a matsayin mai gaskiya tare da taya wanda ya yi nasara murna.
