Karamar Hukumar Warawa a Jihar Kano ta fara samun ruwan sha a karon farko cikin fiye da shekaru biyar. Wannan ya biyo bayan fara gwajin tura ruwa da Ma’aikatar Ruwa, Muhalli da Sauyin Yanayi ta Jihar Kano ta yi a layukan rarraba ruwa na yankin.
SolaceBase ta ruwaito cewa Kwamishinan Ruwa, Muhalli da Sauyin Yanayi, Dr. Dahiru M. Hashim ne ya bayyana haka a cikin wata sanarwa da aka sanya wa hannu a ranar Laraba, bayan ya duba madatsun ruwa na Wudil da Joda.
A cewar kwamishinan, gyaran da ake ci gaba da yi wa ayyukan samar da ruwa na shiyyoyi a jihar ya fara samar da kyakkyawan sakamako. Wannan ya sanya ruwa ya fara isa ga al’ummomin da wadannan madatsun ruwa ke wa hidima.
Ya bayyana cewa Madatsar Ruwa ta Wudil, wadda ke da karfin samar da lita miliyan 25 a kowace rana (MLD), yanzu tana da ikon samar da ingantaccen ruwa ga Karamar Hukumar Wudil bayan da aka sanya ta a tsarin wutar lantarki na rukunin ‘Band A’.
“Yanzu madatsar ruwan tana samun wutar lantarki ta tsawon sa’o’i 18 zuwa 22 a kullum, sabanin sa’a guda kacal da take samu a baya. Wannan ya fito da damar samar da ruwa da rarraba shi akai-akai,” in ji Da. Hashim.
Ya kara da cewa an fara gwajin tura ruwa a layin rarraba ruwa na Warawa domin auna karfin ruwan tare da gano wuraren da ke fita kafin a dawo da jigilar ruwan gaba daya.
“Wannan bututun ruwan yana ganin gudanar ruwa ne a karon farko cikin fiye da shekaru biyar, kuma da zarar ya fara aiki gaba daya, yana da karfin kai ruwa ga al’ummomi har zuwa Rijiyar Gwan-gwan,” in ji shi.
Haka kuma, kwamishinan ya bayyana cewa nan ba da dadewa ba za a fara makamancin wannan gwajin karfin ruwan a layukan rarraba ruwa na Gaya da Dawakin Kudu. Wannan na cikin kokarin dawo da wadatar ruwa daki-daki a yankunan da abin ya shafa.
Dr. Hashim ya kuma bayyana cewa Madatsar Ruwa ta Joda, wadda ke da karfin samar da lita miliyan 9.6 a kowace rana, ta sake dawowa da tura ruwa ga al’ummomi da dama a Karamar Hukumar Gabasawa.
