Rundunar ‘yan sandan Jihar Kano ta cafke kayan da ake zargin abubuwan fashewa ne da kuma miyagun ƙwayoyi a wasu ayyuka guda biyu da aka gudanar a sassa daban-daban na ƙananan hukumomin birnin jihar.
Rundunar ta fitar da bayanin ne ta bakin kakakinta, CSP Abdullahi Kiyawa, a Kano, inda bayanin ya nuna cewa jami’an ‘yan sanda na sashen Rijiyar Lemo, bisa umarnin Kwamishinan ‘yan sanda, sun aiwatar da sammacin bincike a wani gida da ke unguwar Tudun Bojuwa, ƙaramar hukumar Fagge.
A yayin binciken, an gano manyan buhuna biyu ɗauke da abubuwan da ake zargin masu laifi ne.
Tawagar ƙwararru daga sashen kula da lalata abubuwan fashewa da na sinadarai, halittu, na rundunar ‘yan sanda ta gudanar da tantancewa da gano nau’in kayan.
Ɗaya daga cikin buhunan ya ƙunshi nannade-nannaden igiyoyin fashewa guda shida, yayin da ɗayan ya ƙunshi fakiti 20 na ganyayyaki busassu da ake zargin tabar wiwi ne, tare da ƙananan ledoji 220 na ƙwayoyin Exol, inda bincike ke ci gaba a kai.
A wani aikin na daban, jami’an sashen Anti-Thuggery na rundunar, yayin sintiri bisa bayanan sirri, sun tare wani direban babur mai ƙafa uku a unguwar Sani Mainagge, ƙaramar hukumar Gwale, dauke da buhuna uku cike da abubuwa masu nauyi da ake zargi.
Bayan tantancewar da ƙwararru daga sashen EOD-CBRN suka yi, an gano na’urorin fashewa na lantarki guda 3,700.
Hakan ya kai ga kama wani mutum mai suna Ibrahim Garba, wanda aka fi sani da Manyan Baki, mai shekaru 49 daga Jihar Zamfara, wanda bincike ya nuna yana taimakawa wajen safarar kayan daga Jihar Nasarawa zuwa wasu wurare.
Kwamishinan ‘yan sandan Jihar Kano, Ibrahim Bakori, ya yaba wa jami’an da suka gudanar da ayyukan, tare da kiran al’umma da su kasance masu lura da duk wani motsi ko abu da ba a yarda da shi ba, su kai rahoto ga ofishin ‘yan sanda mafi kusa domin tabbatar da tsaron jama’a.
