Dangane da ci gaban da aka samu na noman Cocoa da kayayyakinsa, hukumar kula da ingancin kayayyaki ta Najeriya SON da sauran masu ruwa da tsaki a fannin Cocoa a kwanan baya sun yi nazari kan ka’idojin masana’antu na kasa (NIS) 990:2017 yayin taron kwamitin da aka gudanar a dakin gwaje-gwaje na hukumar dake Ogba a jihar Legas.
Darakta Janar Mallam Farouk A. Salim a jawabinsa a wajen taron ya bayyana cewa, akwai bukatar a gaggauta yin bitar ka’idojin Cocoa don dorewar noman sa ta hanyar sanya manyan bukatu a cikin ka’idojin kasa na Cocoa, wanda zai yi dai-dai da mafi kyawun ayyuka na kasa da kasa da kuma inganta noman Cocoa a duniya gaba daya.
Mallam Farouk Salim wanda ya samu wakilcin shugabar sashen fasahar abinci ta Drs Omolara Okunlola, ta jaddada bukatar dorewar noman Cocoa wanda shine babban abin damuwa ganin yadda ake noman Cocoa a kananan gonaki a sassan duniya da basu da isassun kayayyakin more rayuwa da kuma samar da ababen more rayuwa tare da bayar da kayan aiki ga manoma.
A cewar Salim, ba za a iya mantawa da muhimmancin Cocoa a tattalin arzikin duniya ba, shi ya sa kungiyar kula da daidaito ta kasa da kasa (ISO), da kuma kungiyar kula da daidaito ta yankin Afirka (ARSO), wadda SON mamba ce ta hada kai da wakilai daga masu samar da koko da kuma sauran kasashe don habaka sabbin ka’idoji don magance batutuwan da suka daɗe a masana’antar.
Daga nan ne Shugaban Hukumar ta SON ya gode wa dukkan mahalarta taron da suka ba da lokaci don halartar taron, yayin da ya mika ta’aziyya ga ‘yan kungiyar bisa rasuwar tsohon shugaban TC, Dokta SO Aroyeoun na Cibiyar Bincike ta Cocoa (CRIN) da sauran wadanda suka rasa rayuwarsu a lokacin annoba.
Sabuwar shugabar kwamitin kula da fasaha, Misis C. O. Jayeola a nata jawabin ta bayyana cewa bai kamata a bar Najeriya a baya ba idan ana maganar noman Cocoa; “Lokaci ya yi da za a inganta tare da gano sabon samfurin, saboda wannan zai tabbatar da ingantattun ka’idojin aiki da ingantattun samfuran,” in ji ta.
Wadanda suka halarci taron sun hada da wakilai daga Cibiyar Nazarin Cocoa ta Najeriya, NAFDAC, Rightway Business Support, Ma’aikatar Ciniki da Masana’antu ta Tarayya (FMTI), Nestle Nigeria Plc, Federal Competition and Consumer Protection Commission, (FCCPC), Promasidor, Mutiu Ola. , Cadbury, Institute of Professional Analyst of Nigeria (IPAN), Nigeria Agricultural Quarantine Services (NAQS) da kuma wakilai daga SON masu taimakawa sakatariya.
