Shugaban kungiyar malaman sadarwa da kwararru na Najeriya (ACSPN), Farfesa Umaru Pate, ya ce an fara wani sabon tsarin manhajar sadarwa wadda zata kawo sauyi ga harkar yada labarai.
Da yake magana a wajen wani mai taken AskMe wanda ACSPN da Cibiyar ‘yan Jarida ta Duniya (IPC) suka shirya, ya ce manhajar za ta dinke barakar dake tsakanin yadda ake karantar da ilimin sadarwa da yadda ake aikin sadarwa.
Pate, wanda kuma shi ne shugaban jami’ar tarayya ta Kashere ta jihar Gombe, ya ce manhajar ta kunshi gogewa daban-daban da tunani da misalai daga sassa daban-daban na duniya.
“Yana da kyay ku sani cewa Hukumar Kula da Ilimi, Kimiyya da Al’adu ta Majalisar Dinkin Duniya (UNESCO) ta shiga cikin tsarin karatun. Mun kuma samu gogaaggun masana a cike da wajen Najeriya. Manhajar dai ta zamani ce kuma ta gano abubuwan da ke faruwa a wannan zamani a fannin sadarwa,” inji shi.
Wasu takamaiman wuraren da aka kama a cikin manhajar sun haɗa da samar da kudade, shirye-shirye, ingancin kwarewa ta fannin kasuwancin watsa labarai, yadda ƙwararrun za su iya amsa fasahar da ke tasowa, musamman Intanet dangane da kafofin watsa labarai na zamanin baya.
Ya ce zuwa makon farko na watan Fabrairu, za a yi taro a Jami’ar Bayero ta Kano, inda kwararru da masu ruwa da tsaki za su nazarci tsarin karatun.
Taron, in ji shi, ya kasu kashi biyu ne: Tallafin kafofin yada labarai a Najeriya, inda masu yin aiki za su kalli tsarin da ake ciki a yanzu.
Za a gayyaci masu magana irin su shugaban gidan talabijin na Channels TV, John Momoh da shugaban Media Trust Limited, Mallam Kabiru Yusuf, don bayyana ra’ayoyi, in ji Pate.
Ya ce mahalarta taron za su kuma duba yadda kafafen yada labarai za su ci gaba da rayuwa, ko ta yanar gizo ko kuma ta layi.
Malamin ya kuma ce za su yi duba na karshe a kan manhajar da kyau kafin mataimakin shugaban kasa ya kaddamar da shi.
Farfesa mace ta farko a fannin sadarwa, Chinyere Stella Okunna, wacce a halin yanzu take koyarwa a Sashen Sadarwa na Jami’ar Nnamdi Azikiwe Awka, Jihar Anambra, ta yi tambaya ko za a iya dakatar da wadanda ba su da ilimin sadarwa gudanar da aikin watsa labarai.
Ta ce, “komai kyau da turancin mutum ba za ka iya zuwa kotun shari’a ya yi magana kamar lauya ba.”
Da yake mayar da martani, Pate ya ce Intanet ta sa kusan ba zai yuwu a kware a masana’antar ba.
Ya bayyana cewa doka ta ce ba za ku iya aikin jarida ba sai dai kuna da mafi ƙarancin difloma, amma aiwatar da aiki yana da matukar wahala.
Babban Darakta na IPC, Lanre Arogundade, ya yi magana kan yuwuwar yadda Cibiyar Nazarin Jarida ta Najeriya (NIJ) za ta iya gyara a matsayin cibiyar kwararru.
Arogundade bai yarda cewa NIJ yakamata ta kasance tana gudanar da shirye-shiryen difloma ba.
A nata bangaren, wata farfesa a Jami’ar Caleb Legas, Oluyinka Esan, ta ce dole ne malamai su kasance da sha’awar kuma su kara yin bincike.
A ƙarshe, Pate ya ce jagoranci yana da matuƙar mahimmanci ga manyan abokan aikin su gane cewa dole ne a taimaki takwarori masu tasowa tare da basu dama.
Sai dai ya bayyana kalubalen girman kai, inda ya ce wasu matasa malamai na ganin sun san komai.
Ya ce, “idan ka je sassan tsagayar sadarwar mu, sai ka ga ana jin haushin juna da nuna kiyayya.
Wasu mahalarta taron da suka shiga tattaunawar sun hada da, Farfesa Ralph Akinfeleye, Babban Sakatare ACSPN, Farfesa Nosa Owens-Ibie; da sauransu.
