Hukumar korafe-korafen al’umma da yaki da cin hanci da rashawa ta jihar Kano, PCACC, ta bayyana damuwarta kan hauhawar farashin burodi da sauran kayan abinci, inda ta sha alwashin ba za ta ci gaba da zura ido haka kawai ba, sakamakon hauhawar farashin kayayyaki da wasu ‘yan kasuwa ke yi a jihar.
Shugaban Hukumar Barista Muhuyi Magaji Rimin Gado ne ya bayyana hakan a ranar Alhamis, inda ya koka kan halin da ake ciki a hedikwatar hukumar da ke Kano.
Rimin Gado ya ce ana kara nuna damuwa a tsakanin jama’a kan farashin burodi a halin yanzu duk da tsayuwar farashin fulawa a kasuwa, wanda hakan ya janyo koke-koke da dama ga hukumar.
Ya bayyana cewa daga makon da ya gabata zuwa farkon makon nan hukumar ta samu korafe-korafe da dama daga al’umma game da rage farashin fulawa.
Karin labari: Sarakunan Gargajiya na kasa sunyi kira da a tsaya a tattauna kan zanga-zanga
“Don haka mutane suna son hukumar ta gano dalilin da ya sa masu sayar da burodi suka ki rage farashin burodi.
“Mun sami damar ganawa da masu yin burodi, amma sun yi jayayya cewa sun rage farashin burodi. Sai dai kuma sun koka da cewa a cikin kwanaki biyu dillalan fulawa sun kara farashin Naira 5,000 kan kowanne buhu.
“Sun koka da cewa ana sayar da garin a kan kudi kusan Naira 60,000 kuma yanzu ana sayar da shi a kan Naira 65,000, kamar yadda suka fada.”
Ya bayyana cewa hukumar na shiga tsakani a tsakanin jagorori domin ganin an yi abin da ya dace da kuma tabbatar da cewa karin farashin bai zama na wucin gadi ba.
Karin labari: Hukumar NDLEA ta cafke mutum 22 masu safarar kwayoyi a Kano
Rimin Gado ya bayyana cewa hukumar na aiki tukuru domin gano musabbabin hauhawar farashin kayayyaki, kuma za ta dauki mataki na musamman” don yakar wannan barazana.
‘’Mun sha yin haka a lokuta da dama don ganin cewa talakawa ba sa shan wahala. Mun bi wadanda suke tara kayan abinci a watan azumi na Ramadan kuma mun sami damar rage farashin.
“Lokacin da muka sami korafi daga mutane har ma a lokacin COVID-19 da karancin mai, muna hada gwiwa da hukumomin da abin ya shafa don tabbatar da cewa an kawo tallafi ga jama’a.”
“Don haka ne shugaban kasa Bola Tinubu a lokacin watan Ramadan da muka fara jawabi wajen tattara kayan abinci ya yaba da kokarin tare da rokon sauran jihohi da su yi koyi da Kano a matsayin matakin magance matsalar karancin abinci.
A cewar Muhuyi Magaji Rimin Gado, hukumar tana da hukunce-hukunce guda biyu: ba wai yaki da cin hanci da rashawa kadai ba, har ma da aiki a matsayin mai kula da harkokin jama’a, kamar karin farashin kayayyaki ko wasu korafe-korafe daga jama’a.
