Gwamnatin Tarayya ta ayyana ranar Alhamis, 1 ga Oktoban 2026, a matsayin ranar hutu domin bikin cikar Najeriya shekaru 66 da samun ’yancin kai.
Ministan Harkokin Cikin Gida, Olubunmi Tunji Ojo, ne ya sanar da hakan a madadin Gwamnatin Tarayya, a cikin wata sanarwa da sakatariyar dindindin ta ma’aikatar, Magdalene Ajani, ta sanya wa hannu a ranar Laraba.
Read also: Yan siyasar Arewa sun gaza wajen ci gaban yankin – Uba Sani
Tunji Ojo ya taya al’ummar Najeriya na gida da waje murnar zagayowar ranar samun ’yancin kan kasar, tare da yin kira a gare su da su yi amfani da bikin wajen nuna hadin kai, kishin kasa, zaman lafiya da mutunta juna.
Ya ce zaman lafiya da kwanciyar hankali muhimman sharudda ne wajen samun ci gaban kasa, inda ya yi kira ga ’yan Najeriya da su yi koyi da wadanda suka kafa kasar wajen nuna kaunar ta.
Read also: An dage shari’ar dan Chanar da ya kashe Ummita a Kano
“Yayin da muke bikin cikar shekaru 66 da samun ’yancin kanmu, ya kamata mu rika tuna cewa akwai fata ga kasarmu, kuma bambancin da ke tsakaninmu shi ne karfinmu. Haka kuma, jajircewarmu ta bai daya ita ce ginshikin da za a gina kasa mai karfi da wadata a kai.”
Ministan ya tabbatar wa ’yan Najeriya cewa Gwamnatin Tarayya na ci gaba da kokarin karfafa tsaron kasa, inganta lafiyar jama’a da samar da yanayin da ’yan kasa za su iya rayuwa, aiki da kuma neman halal dinsu cikin kwarin gwiwa.
Read also: Dalilin da yasa na kashe abokina, ma’aikacin KEDCO – Wanda ake zargi
Ya kuma ce shirin gwamnatin mai taken Renewed Hope Agenda zai ci gaba da kokarin samar da Najeriya mafi inganci ga dukkan ’yan kasar.
Tunji Ojo ya bukaci ’yan Najeriya da su yi amfani da bikin wajen sake tabbatar da kudurinsu na samar da hadin kan da zaman lafiya a kasa.
