Hukumar tsaron farin kaya ta DSS ta kama wani dan fafutuka kuma mai sharhi kan harkokin siyasa mazaunin Kaduna Mahdi Shehu.
An kama Shehu ne a karshen mako a kan wani faifan bidiyo na bogi, da ke iyaka da batun tsaron kasa, wanda ya yi ta yaduwa.
“Zan iya gaya muku cewa shi [Mahdi Shehu] yana tsare a Kaduna. Haka kuma za a iya gurfanar da shi a gaban kotu a ranar Litinin ko kuma nan ba da dadewa ba,” daya daga cikin majiyoyin ta ce, an kama dan gwagwarmayar ne bayan yunkurin sasanta labarin bidiyon na bogi ya ci tura.
“Ya watsa wani tsohon faifan bidiyo a shafukan sada zumunta kuma ya zargi gwamnatin Najeriya da shirin kafa sansanin sojin Faransa a yankin Arewa maso Yamma.
“Tuni, an ba da takamaiman umarni game da gurfanar da Shehu. An kuma umurci jami’an tsaro da su tabbatar da cewa ba a tauye hakkin dan gwagwarmayar ba yayin da yake tsare,” wata majiya ta ce.
Dateline Nigeria ta rahoto cewa tsohon babban Lauyan gwamnatin tarayya kuma ministan shari’a, Abubakar Malami (SAN) a watan Fabrairun wannan shekara ya bayyana yadda aka damke Shehu kan yunkurin karbar kudi.
Shehu ya yi ikirarin ta bakin lauyansa, Mohammed Abubakar, cewa an kama shi ne saboda kiran Shugaba Bola Tinubu da ya binciki tsohon shugaban kasa Muhammadu Buhari da wasu manyan jami’an sa.
Amma Malami, a wata sanarwa daga kamfanin sa mai sa hannun A.A. Lauyan Sherif ya yi zargin cewa an kama Shehu ne a Kaduna lokacin da ya yi yunkurin cin zarafin matarsa Aisha kan kudi dala 500,000.
Yayin da Sheriff ya ki amincewa da zargin dan fafutukar, ya bayyana cewa an kama wanda ake zargin ne da laifukan da suka shafi karbar kudi, cin zarafi da kuma yunkurin yaudarar kungiyar ta hanyar yin amfani da lambobin GSM da imel.
