Majalisar Wakilai ta yi kira ga Kamfanin Mai na kasa (NNPC), da ya dakatar da kamfanoni hudu da suka shigo da gurbataccen man fetur a cikin kasar.
Majalisar ta kuma umarci kwamitinta mai kula da albarkatun man fetur da yayi bincike kan lamarin domin gurfanar da masu laifin.
Hakan ya biyo bayan kudirin gaggawa na muhimmancin jama’a da babban mai shigar da kara na majalisar, Mohammed Monguno, ya gabatar a ranar Alhamis.
Majalisar ta kuma nuna damuwarta kan illar da wannan gurbataccen man fetur ke yi a kan ababen hawa da kuma yadda farashin sufuri, kaya da kuma hidima ya karu.
Wasu daga cikin ‘yan majalisar sun koka kan yadda tsarin ya lalace gaba daya, la’akari da hanyoyin da mai ya kamata ya bi kafin ya isa gidajen mai.
Majalisar ta kuma umurci kwamitinta mai kula da harkokin man fetur (Downstream) da ya binciki bayanan sayan man da aka yi daga watan Janairu zuwa yau don tabbatar da ko sun cika ka’idojin kasa da kasa.
Kwamitin zai kuma binciki irin rawar da hukumar NNPC mai iyaka, Standard Organisation of Nigeria, SON, Navy da duk sauran hukumomin da ke kula da harkokin man fetur suka taka wajen samar da kayayyakin da ake kashewa.
Sun nemi a biya ‘yan Najeriya da abin hawa da kayan aikinsu da gurbataccen mai ya shafa kai tsaye.
