Bayan doguwar tattaunawa da sanyin safiyar ranar Litinin din, Majalisar Zartarwa ta kasa, ta kungiyar malaman jami’o’i, ASUU, ta kada kuri’ar fara yajin aikin gargadi na wata daya domin kara matsawa gwamnatin tarayya kan bukatunsu.
Wata majiya a wajen taron da aka gudanar a Legas ta shaida wa Vanguard cewa za’a shiga yajin aikin ne domin takurawa gwamnatin tarayya ta yi abunda ya dace.
“Muna son kara baiwa gwamnati dama, wanda muke fatan za ta yi amfani da ita domin kaucewa janyo abin da zai gurgunta ayyukan ilimi a jami’o’in kasar nan. Mu ma iyaye ne kuma muna da ‘ya’yanmu a cikin tsarin amma ba za mu iya kallo da kuma barin gaba daya tabarbarewar ilimi a kasar ba.
“Tashin hankalinmu yana da amfani ga kowa da kowa kuma idan tsarin ya inganta, duk za mu ji daɗinsa. Wasu fitattun mutane a kasar sun shiga cikin lamarin amma da alama gwamnati ta kyale su. Shugaban mu na kasa zai yi karin bayani idan zai yi wa manema labarai karin haske a yau,” inji shi.
Idan za’a iya tunawa kungiyar ta koka kan wasu bukatu da suka hada da biyan kudaden alawus din da aka samu na ilimi, asusun farfado da tattalin arziki, sauya tsarin tsarin biyan albashin ma’aikata, IPPIS, da tsarin fayyace ma’auni na jami’a UTAS, da dai sauransu.
