Babbar kotun babban birnin tarayya da ke Abuja ta bayar da belin wucin gadi ga tsohon Antoni Janar na tarayya, Abubakar Malami SAN, a shari’ar da Hukumar Yaƙi da Cin Hanci da Rashawa da Laifukan Kuɗi ke gabatarwa a kansa.
Mai shari’a Bello Kawu ne ya yanke wannan hukunci yayin da yake sauraron ƙarar da aka shigar a gaban kotun, inda ya amince da bayar da belin bisa wasu sharuɗɗa da aka riga aka yi la’akari da su tun farko.
Kotu ta amince da belin ne bisa sharuddan da suka haɗa da mika fasfo na ƙasa da ƙasa na Abubakar Malami, da kuma ɗaukar lamuni ta hannun masu tsaya masa biyu kamar yadda Hukumar Yaƙi da Cin Hanci da Rashawa da Laifukan Kuɗi ta tanada a baya.
Masu tsaya masa sun haɗa da Darakta Janar na Hukumar Tallafin Shari’a ta Najeriya, da kuma ɗan Majalisar Wakilai mai wakiltar mazabar tarayya ta Augie da Argungu.
Kotu ta kuma sake duba tare da dawo da wasu sharuɗɗan beli da aka riga aka cika a baya, waɗanda suka haɗa da samar da masu tsaya masa biyu da kuma mika fasfon tafiya na ƙasa da ƙasa na wanda ake ƙara.
Mai shari’a Bello Kawu ya bayyana cewa an bayar da belin ne bisa dalilin wahala ta musamman, tare da jinkirta shari’ar zuwa wani lokaci domin sauraron ainihin ƙarar da aka shigar a gaban kotu.
Kotun ta ɗage sauraron shari’ar zuwa wani lokaci domin ci gaba da sauraron ƙarar, inda aka tabbatar da cewa Abubakar Malami ya amince da dukkan sharuɗɗan da aka gindaya masa.
