Shugaban Ƙasa Bola Ahmed Tinubu ya dawo Abuja a ranar Talata bayan shafe makonni biyu yana hutun shekara a birnin Paris na ƙasar Faransa.
Shugaban ƙasar ya sauka a filin jirgin sama na Nnamdi Azikiwe, inda aka tarbe shi a sashen shugabanni na filin jirgin ta hannun shugaban majalisar dattawa, Godswill Akpabio; shugaban ma’aikata na fadar shugaban ƙasa, Femi Gbajabiamila; da gwamnan jihar Nasarawa, Abdullahi Sule.
Tinubu ya tashi daga Najeriya zuwa Faransa ne a ranar 4 ga Satumba, 2025 domin gudanar da wani ɓangare na hutunsa na shekara.
Tun da farko an tsara ya raba lokacin hutun tsakanin Faransa da Birtaniya.
Yayin da yake birnin Paris, shugaban Najeriya ya gana da shugaban ƙasar Faransa, Emmanuel Macron, a fadar Élysée inda suka tattauna kan dangantakar ƙasashen biyu da kuma yadda za a zurfafa haɗin kai domin ci gaba da wadata juna da tabbatar da zaman lafiya a duniya.
Dawowar Tinubu na nuna cewa ya koma kan aikinsa na shugabanci bayan hutun da ya ɗauka.
NAN
