Wasu fasinjoji da suka yi amfani da layin jirgin ƙasa na Abuja–Kaduna sun bayyana munanan abubuwa da suka fuskanta yayin tafiya, ciki har da zargin sayar da tikiti ta bayan fage, cunkoso fiye da ƙima, da matsalolin aiki da na’ura.
Fasinjojin da suka tattauna da kamfanin dillancin labarai sun ce an bar su tsaye sama da sa’o’i uku da rabi a tafiyar da ya kamata ta ɗauki bai wuce sa’o’i biyu ba.
Wasu sun ce injin samar da wutar lantarki na jirgin yana zafi sosai har ma’aikata suka riƙa zuba ruwa da bokiti domin sanyaya shi a tsakiyar tafiya.
A cewar su, a duk lokacin da hakan ta faru, na’urorin sanyaya iska da fitilu a cikin dakunan jirgin suna ɗaukewa, jirgin kuma yana tafiya a hankali ƙwarai.
Sun bayyana takaicinsu cewa sabis ɗin da aka ƙaddamar domin zama mafi aminci fiye da hanya ta mota mai cike da matsalar tsaro, ya koma wahala ga matafiya.
Wani fasinja ya ce ya sha ƙoƙarin sayen tikiti ta Internet amma ana nuna masa cewa kujeru sun cika.
Daga bisani aka haɗa shi da wani jami’i da ake zargi yana sayar da tikiti a ɓoye kan kuɗi mafi tsada fiye da farashin hukuma.
An ba su tikiti da sunaye daban, kuma a tafiyar dawowa ba su samu lambar kujera ba, lamarin da ya tilasta musu tsayawa a hanya na tsawon lokaci.
Wani fasinja ya ce cunkoso ya fi muni a ƙarshen mako sakamakon rage yawan zirga-zirgar jirage daga sau shida a rana zuwa sau biyu kawai.
Ya buƙaci a ƙara yawan tafiye-tafiye domin biyan buƙatar da ke ƙaruwa.
Wasu sun kuma koka da yawan lalacewar na’ura yayin tafiya, suna cewa jirgin na yawan samun matsalar zafi da ke janyo katsewar wuta da tafiya a hankali, lamarin da ke jefa su cikin fargabar tsaro.
Sai dai mahukunta sun musanta zargin sayar da tikiti ba tare da lambar kujera ba, suna cewa tsarin sayar da tikiti na Internet yana haɗa suna, lambar shaidar ƙasa da lambar waya, kuma ba zai yiwu a samu tikiti ba idan bayanai ba su dace ba.
Sun amince cewa wani lokaci ana samun matsalar na’urar samar da wuta mai sanyaya iska, amma ba injin jan jirgin ba ne ake zuba wa ruwa.
Haka kuma sun ce an tsawaita lokacin tafiya ne domin dalilan tsaro bayan wani hatsari da ya faru a baya, kuma ana shirin ƙara yawan tafiye-tafiye domin rage cunkoso.
Duk da wannan bayani, fasinjoji da dama sun nuna rashin gamsuwa, suna cewa ana buƙatar gyara mai ma’ana a tsarin sayar da tikiti, ƙara yawan jirage, da inganta kulawa da na’urori domin dawo da amincewar jama’a.
