Daga: Muhammad Abdul
A ranar Asabar ne kungiyar ‘yan kasuwa a jihar Kano ta kafa wani kwamiti kan bada agajin gaggawa domin samar da tsaro a fadin kasuwanni da wuraren kasuwanci a yayin zanga-zangar da aka shirya yi a fadin Najeriya.
SolaceBase ta rawaito cewa Kano cibiyar kasuwanci ce a yankin kudu da hamadar sahara, kuma a halin yanzu tana da manyan kasuwanni 8, da kuma shaguna masu fa’ida iri-iri da ke a wurare masu mahimmanci a cikin birnin mai kusan mutane a kalla miliyan 20.
Alhaji Sabi’u Bako, shugaban ’yan kasuwar a Kano, wanda ya yi jawabi a wani taron gaggawa da wakilan manyan kasuwanni da manyan kantuna, ya bayyana bukatar daukar kwararan matakai na dakile satar dukiyar jama’a.
Karin labari: Majalisar Wakilan Najeriya za ta binciki tsakanin Matatar Man Dangote da Hukumar kula da Mai ta kasa
A yayin taron, shugaban kungiyar ‘yan kasuwa masu jituwa ta kasa, Alhaji Bature Abdul Aziz ya kaddamar da kwamitin mutane 20 domin gudanar da ayyukan kungiyar masu dogaro da kai.
A jawabinsa a wajen bikin, shugaban kungiyar ‘yan kasuwar Kantin Kwari, Alhaji Balarabe Tatari, ya bukaci matasa da su daina yin ayyukan da za su kawo cikas ga zaman lafiya a jihar.
Balarabe Tatari ya ce, “rahotannin da ke yawo na nuni da cewa za’a gudanar da zanga-zangar cikin lumana, duk da cewa ya zama wajibi mu samar da isassun matakan kare Kano a matsayin cibiyar kasuwanci” in ji shi.
Karin labari: “Ku bayyana Sunayenku da Adireshinku ga ‘Yan Sanda” – IGP Ya Fadawa Jagororin Shirya Zanga-zanga
Ya bayyana cewa “muna sane da cewa a irin wannan yanayi, bata gari sukan shiga lamarin su mayar da shi wani abu ta hanyar wawashe dukiya da lalata wasu kayan”.
Shugaban ya ce “Ina kira ga matasa da su sanya a ransu cewa Kano ce gidansu kuma duk wani yunkuri na ganin an zaunar da shi zai haifar da yanayi na rashin tabbas.
A nasa bangaren, Manajan Daraktan Hukumar Kula da Kasuwar Kantin Kwari, Alhaji Hamisu Sa’adu Dogon Nama, ya yi kira ga ‘yan kasuwa da sauran ‘yan kasuwa a Kantin Kwari da su bi umarninsu tare da ba da gudummawar kason su don tabbatar da doka da oda.
