A ranar Asabar 20 ga watan Yuli ne ake sa ran Shugaba Bola Tinubu zai tashi daga Abuja zuwa birnin Accra na kasar Ghana, domin halartar taron koli na tsakiyar shekara na kungiyar Tarayyar Afirka (AU), da kungiyar raya tattalin arzikin yankin (RECs), da na’urori na yankin (RMs), da kuma Membobin Tarayyar Afirka.
A matsayinsa na shugaban kungiyar ECOWAS, shugaba Tinubu zai yi jawabi kan matsayin hadin kan yankin a sassa daban-daban na Afirka.
Wata sanarwa da mai magana da yawunsa, Ajuri Ngelale, ya fitar a ranar Juma’a, ta ce shugaban zai bayyana nasarori da kalubalen da aka fuskanta a yammacin Afirka tun bayan ganawar karshe da aka yi a Nairobi na kasar Kenya, a watan Yulin 2023.
Karin labari: Hukumar NAFDAC ta rufe wani gidan Burodi a Sakkwato
“Shugaban za su gabatar da rahoton ‘2024 game da yanayin al’umma,’ wanda zai mai da hankali kan zaman lafiya, tsaro na yanki, gudanar da mulki da hadewar tattalin arziki, tare da ayyukan jin kai da ci gaban zamantakewa da na makamashi da ma’adinai da kuma harkar noma.”
Sanarwar ta ce, “An tsara taron daidaitawa na tsakiyar shekara a cikin 2017 a matsayin babban taron AU da RECs don daidaita ayyukansu da kuma daidaita tsarin aiwatar da ajandar haɗin gwiwar nahiyar, wanda ya maye gurbin tarukan watan Yuni da Yuli,” in ji sanarwar.
Karin labari: ‘Yan sanda a Katsina sun kama wani matashi kan zargin bada bayanai ga ‘yan fashi
A watan Yulin 2023, Shugaba Tinubu, wanda a lokacin aka zabe shi a matsayin Shugaban kungiyar ECOWAS, ya gabatar da jawabinsa na farko a taron hadin gwiwa na shekara biyar na AU a Nairobi da ke Kenya, inda ya tabbatar da karfin Afirka da kuma bukatar hadin kai.
A birnin Accra, abubuwan da ke cikin ajandar za su hada da tantance tsarin gargadin farko na kungiyar ta AU da kuma hanyoyin rigakafin rikice-rikice da inganta hadin gwiwa tsakanin al’ummomin tattalin arzikin yankin don hanzarta hadewa.
Za a amince da sanarwar a ƙarshen taron.
Shugaba Tinubu zai samu rakiyar manyan jami’an gwamnati kamar yadda NAN ta wallafa.
